மோட்டார் சைக்கிள்கள் மோதல்; கொத்தனார் சாவு

திசையன்விளை:

களக்காடு பொத்தைசுத்தி பகுதியை சேர்ந்தவர் ஆனந்தராஜ் (வயது 47). அதே ஊரைச் சேர்ந்தவர் சாமுவேல் (40). கொத்தனார் வேலை செய்து வந்தனர். இவர்கள் 2 பேரும் நேற்று முன்தினம் இரவு ஒரே மோட்டார் சைக்கிளில் திசையன்விளையில் இருந்து களக்காட்டுக்கு சென்று கொண்டிருந்தனர். மோட்டார் சைக்கிளை ஆனந்தராஜ் ஓட்டி சென்றார்.

திசையன்விளையை அடுத்த குமாரபுரம் அருகே சென்றபோது பொத்தகாலன்விளையை சேர்ந்த பிரான்சிஸ் (35) என்பவர் மற்றொரு மோட்டார் சைக்கிளில் வந்தார். அப்போது, கண் இமைக்கும் நேரத்தில் 2 மோட்டார் சைக்கிள்கள் மோதிக் கொண்டதாக கூறப்படுகிறது. இதில் ஆனந்தராஜ் சம்பவ இடத்திலேயே பரிதாபமாக இறந்தார். மற்ற 2 பேரும் படுகாயம் அடைந்தனர். அவர்கள் பாளையங்கோட்டை ஐகிரவுண்டு அரசு மருத்துவமனையில் சிகிச்சைக்காக அனுமதிக்கப்பட்டனர். இதுகுறித்து திசையன்விளை போலீஸ் இன்ஸ்பெக்டர் ஜமால் வழக்குப்பதிவு செய்து விசாரணை நடத்தி வருகிறார்.