பஸ் நிலையத்தில் கல்லூரி மாணவியிடம் சில்மிஷம்: 2 பேர் கைது

கோவை,

திருவாரூரைச் சேர்ந்த 19 வயது கல்லூரி மாணவி கோவையில் உள்ள ஒரு தனியார் கல்லூரியில் பி.இ. 2-ம் ஆண்டு படித்து வருகிறார். இவர் கோவை காந்திபுரம் டவுன் பஸ் நிலையத்துக்கு செல்ல தனியார் டவுன் பஸ்சில் வந்தார். அப்போது டிரைவர் திடீரென்று பிரேக் போட்டார்.

இதனால் நிலைதடுமாறிய அந்த மாணவி பஸ்சுக்குள் கீழே விழுந்தார். இதைப் பார்த்து பஸ்சில் இருந்த 2 பேர் அவரை கேலி செய்தனர். இதையடுத்து அந்த மாணவி, காந்திபுரம் பஸ் நிலையத்தில் இறங்கி நடந்து சென்றார்.

அப்போது அவரை, பின்தொடர்ந்து வந்த 2 பேர் அங்குள்ள கழிப்பிடம் அருகே மாணவியை தொட்டு சில்மிஷம் செய்து கொலை மிரட்டல் விடுத்ததாக கூறப்படுகிறது. இதனால் அதிர்ச்சி அடைந்த அந்த மாணவி கூச்சல் போட்டார்.

இது குறித்து காட்டூர் போலீசில் அந்த மாணவி புகார் அளித்தார். அதன்பேரில் சப்-இன்ஸ்பெக்டர் செல்லமணி வழக்கு பதிவு செய்து மாணவியிடம் சில்மிஷம் செய்த அன்னூர் சத்தி ரோடு கோட்டை தோட்டத்தை சேர்ந்த அசோக் குமார் (வயது 34), ஆலாந்துறை பூலுவபட்டியை சேர்ந்த வெள்ளிமேடு ஆபிரகாம் பிலிப் (35) ஆகிய 2 பேரையும் கைது செய்தார்.

இவர்களில் அசோக்குமார் என்ஜினீயராகவும், ஆபிரகாம் பிலிப் டிரைவராகவும் வேலை பார்த்து வருகிறார்கள். இவர்கள் மீது மானபங்கம், கொலை மிரட்டல் விடுத்தல், பெண்கள் வன்கொடுமை தடுப்பு சட்டம் ஆகிய பிரிவுகளின் கீழ் வழக்கு பதிவு செய்யப்பட்டு உள்ளது.