சென்னை - நெல்லை வந்தே பாரத் ரெயில் வரும் 6ம் தேதி தொடங்கப்படாது-தெற்கு ரெயில்வே

சென்னை,

தமிழகத்தின் முதல் வந்தே பாரத் ரெயில் சென்னை சென்ட்ரல் - கோவை இடையே கடந்த ஏப்.8-ஆம் தேதி தொடங்கப்பட்டது. தமிழகத்தின் தென்மாவட்டங்களை இணைக்கும் வகையில் சென்னையிலிருந்து திருநெல்வேலிக்கு வந்தே பாரத் ரெயில் இயக்க ரெயில்வே வாரியம் திட்டமிட்டுள்ளது. சென்னை - நெல்லை வந்தே பாரத் ரெயில் திருச்சி, மதுரை வழியே திருநெல்வேலிக்கு செல்லும்.

சென்னை - திருநெல்வேலி இடையே தற்போது 10 மணி நேர இடைவெளியில் விரைவு ரெயில்கள் இயக்கப்படும் நிலையில் 'வந்தே பாரத்' ரெயில் 8 மணி நேரத்தில் சென்றடையும்.

திருநெல்வேலியிலிருந்து காலை 6 மணிக்கு புறப்படும் இந்த ரெயில் சென்னைக்கு பிற்பகல் 2 மணியளவில் வந்தடையும். பின் சென்னையிலிருந்து பிற்பகல் 3 மணியளவில் புறப்பட்டு இரவு 11 மணியளவில் திருநெல்வேலி சென்றடையும். இந்த ரெயில் திருச்சி, திண்டுக்கல், மதுரை ஆகிய 3 ரெயில் நிலையங்களில் நின்று செல்லும்.

சென்னை - நெல்லை வந்தே பாரத் ரெயில் சேவையை வரும் 6 ஆம் தேதி பிரதமர் நரேந்திர மோடி கொடியசைத்து தொடக்கி வைக்க உள்ளதாக தகவல் வெளியானது.

இந்நிலையில் சென்னை - நெல்லை இடையேயான வந்தே பாரத் ரெயில் வரும் 6ம் தேதி தொடங்கி வைக்கப்படாது என தெற்கு ரெயில்வே அறிவித்துள்ளது. மேலும், வந்தே பாரத் ரெயிலை பிரதமர் நரேந்திர மோடி கொடியசைத்து தொடங்கி வைப்பதாக வெளியான தகவலுக்கும் தெற்கு ரெயில்வே மறுப்பு தெரிவித்துள்ளது.