வீட்டின் பூட்டை உடைத்து தங்க, வெள்ளி நகைகள் திருட்டு

திட்டச்சேரி:

நாகை மாவட்டம், திருமருகல் ஒன்றியத்திற்கு உட்பட்ட துண்டம் ஆற்றங்கரை தெருவை சேர்ந்தவர் சிங்காரவேல். இவரது மனைவி லாவண்யா (வயது 26). சிங்காரவேல், வெளிநாட்டில் வேலை பார்த்து வருகிறார். இந்நிலையில் சம்பவத்தன்று இரவு லாவண்யா தனது மாமனாரை பார்த்துவிட்டு வருவதற்காக அருகில் உள்ள அவரது வீட்டிற்கு சென்றிருந்தார். அடுத்த நாள் காலை வீடு திரும்பினார். அப்போது வீட்டின் பூட்டு உடைக்கப்பட்டு திறந்து கிடந்தது கண்டு அதிர்ச்சி அடைந்தார். உள்ளே சென்று பார்த்தபோது பீரோவும் உடைக்கப்பட்டு அதில் வைக்கப்பட்டிருந்த தங்கச் சங்கிலி, மோதிரம் மற்றும் வெள்ளி நகைகள் திருடப்பட்டிருந்தன. அவற்றின் மதிப்பு ரூ.30 ஆயிரம் இருக்கும் என்று கூறப்படுகிறது. இதுகுறித்து திட்டச்சேரி போலீசில் லாவண்யா கொடுத்த புகாரின்பேரில் போலீஸ் சப்-இன்ஸ்பெக்டர் சுரேஷ் ராமகிருஷ்ணன் மற்றும் போலீசார் வழக்குப்பதிவு செய்து இந்த திருட்டு சம்பவத்தில் ஈடுபட்ட மர்ம நபர்களை வலைவீசி தேடி வருகின்றனர்.