தொப்பூர் அருகே ரெயிலில் அடிபட்டு ஒருவர் பலி-யார் அவர்? போலீசார் விசாரணை

தர்மபுரி:

தொப்பூர் அருகே ரெயிலில் அடிபட்டு ஒருவர் பலியானார். அவர் யார்? என்பது குறித்து போலீசார் வழக்குப்பதிவு செய்து விசாரணை நடத்தி வருகிறார்கள்.

ரெயில் தண்டவாளத்தில் உடல்

தர்மபுரி மாவட்டம் தொப்பூர் அருகே சேலம் பாதையில் ரெயில் தண்டவாளத்தில் நேற்று காலை சுமார் 40 வயது மதிக்கத்தக்க நபர் ரெயில் தண்டவாளத்தில் உடல் சிதறிய நிலையில் இறந்து கிடந்தார்.

இதனை பார்த்து அந்த வழியாக சென்றவர்கள் அதிர்ச்சி அடைந்தனர். அவர்கள் சம்பவம் குறித்து தர்மபுரி ரெயில்வே போலீசுக்கு தகவல் அளித்தனர். அதன்பேரில் போலீசார் சம்பவ இடத்திற்கு சென்று விசாரணை நடத்தினர். பின்னர் இறந்தவரின் உடலை கைப்பற்றி தர்மபுரி அரசு ஆஸ்பத்திரிக்கு அனுப்பி வைத்தனர்.

போலீசார் விசாரணை

போலீசாரின் முதற்கட்ட விசாரணையில் ரெயில் தண்டவாளத்தை கடந்த போது அந்த வழியாக சென்ற ரெயிலில் அடிபட்டு அவர் உயிரிழந்தது தெரியவந்தது. ஆனால் அவர் யார்?, எந்த ஊரை சேர்ந்தவர்? என்ற விவரங்கள் உடனடியாக தெரியவில்லை.

இது தொடர்பாக ரெயில்வே போலீஸ் சப்-இன்ஸ்பெக்டர்கள் கோதண்டபாணி, ராமசாமி ஆகியோர் வழக்குப்பதிவு செய்து, தீவிர விசாரணை நடத்தி வருகிறார்கள்.