பள்ளி மாணவ-மாணவிகளுக்கு விழிப்புணர்வு போட்டி

நெல்லை அரசு அருங்காட்சியகத்தில் பிளாஸ்டிக் மாசுபாட்டுக்கான தீர்வுகள் மற்றும் மாற்று வழிகளை கண்டறிதல் குறித்து பள்ளி மாணவ-மாணவிகளுக்கு விழிப்புணர்வு போட்டிகள் நடத்தப்பட்டன. வர்ணம் தீட்டுதல், ஓவியம் வரைதல் மற்றும் நெகிழிக்கு மாற்றுப்பொருட்கள் கொண்டு தயாரிக்கப்பட்ட கைவினை பொருட்கள் என 3 போட்டிகள் நடத்தப்பட்டன. 100-க்கும் மேற்பட்ட மாணவ-மாணவிகள் ஆர்வத்துடன் கலந்து கொண்டனர்.

பள்ளிக்கல்வி துறை சார்பில் அருங்காட்சியகத்தில் மரக்கன்று நடும் விழா நடத்தப்பட்டது. அருங்காட்சியகத்தை பார்வையிட வந்த பார்வையாளர்களுக்கும், பொதுமக்களுக்கும் மரக்கன்றுகள் இலவசமாக வழங்கப்பட்டன. தொடர்ந்து நடைபெற்ற பரிசளிப்பு விழாவில் சிஸ்டம் டிரஸ்ட் நிர்வாக அறங்காவலர் ரிப்ளிக்கா வரவேற்றார். அரசு அருங்காட்சியக காப்பாட்சியர் சிவ.சத்தியவள்ளி தலைமை தாங்கினார். நெல்லை மாவட்ட முதன்மை கல்வி அலுவலர் திருப்பதி போட்டியில் வெற்றி பெற்ற மாணவ-மாணவிகளுக்கு பரிசுகளும், சான்றிதழ்களும் வழங்கி பேசினார். சங்கர் மேல்நிலைப்பள்ளி தேசிய பசுமைப்படை திட்ட அலுவலர் கணபதி சுப்பிரமணியன் சுற்றுச்சூழல் தின முக்கியத்துவம் குறித்து பேசினார். தொடர்ந்து அனைவரும் சுற்றுச்சூழலை பாதுகாப்பது தொடர்பான உறுதிமொழியை ஏற்றனர். முடிவில் ஆல் தி சில்ட்ரன் டிரஸ்ட் ஒருங்கிணைப்பாளர் ரீகன் நன்றி கூறினார்.