பாராளுமன்ற தேர்தலில் அ.தி.மு.க. அமோக வெற்றி பெற உழைக்க வேண்டும்; கட்சியினருக்கு அமைச்சர் ஆர்.பி.உதயகுமார் வேண்டுகோள்

கோவில்பட்டி:

பாராளுமன்ற தேர்தலில் அ.தி.மு.க. அமோக வெற்றி பெற உழைக்க வேண்டும் என கோவில்பட்டியில் நடந்த பூத்கமிட்டி ஆலோசனை கூட்டத்தில் கட்சியினருக்கு முன்னாள் அமைச்சர் ஆர்.பி.உதயகுமார் வேண்டுகோள் விடுத்தார்.

ஆலோசனை கூட்டம்

கோவில்பட்டி கிருஷ்ணா நகர் சட்டமன்ற உறுப்பினர் இல்லத்தில் தூத்துக்குடி வடக்கு மாவட்ட அ.தி.மு.க. சார்பில் பூத் கமிட்டி அமைப்பது குறித்த ஆலோசனை கூட்டம் நேற்று முன்தினம் இரவு நடந்தது. கூட்டத்திற்கு மாவட்ட அவை தலைவர் என்.கே. பெருமாள் தலைமை தாங்கினார். முன்னாள் அமைச்சரும், வடக்கு மாவட்ட செயலாளருமான கடம்பூர் ராஜூ எம்.எல்.ஏ. முன்னிலை வகித்தார்.

சிறப்பு விருந்தினராக முன்னாள் அமைச்சரும், ஜெயலலிதா பேரவை செயலாளருமான ஆர்.பி.உதயகுமார் கலந்துகொண்டு வாக்குச்சாவடி நிலை முகவர்கள் மற்றும் பூத் கமிட்டி உறுப்பினர் சேர்க்கைக்கான படிவங்களை வழங்கி பேசினார்.

அவர் பேசியதாவது:-

வெற்றி பெற வேண்டும்

அ.தி.மு.க. நிறுவனர் எம்.ஜி.ஆர். 106-வது பிறந்த நாள் விழா, ஜெயலலிதா 75-வது பிறந்த நாள் விழா மற்றும் அ.தி.மு.க.வின் பொன் விழாவை முன்னிட்டு ஜெயலலிதா பேரவை சார்பில் வரும் பிப்ரவரி 23-ந் தேதி மதுரை மாவட்டம் டி.குன்னத்தூர் அம்மா திருக்கோவில் மணி மண்டபத்தில் 51 கழக குடும்பங்களை சேர்ந்த மணமக்களுக்கு திருமண நிகழ்ச்சி நடைபெறுகிறது. திருமணத்தை முன்னாள் முதல்-அமைச்சரும், சட்டமன்ற எதிர்க்கட்சி தலைவருமான எடப்பாடி பழனிசாமி நடத்தி வைக்கிறார்.

பாராளுமன்ற தேர்தலில் களப்பணி ஆற்ற இப்போதே கழக நிர்வாகிகளும், செயல் வீரர்களும், மகளிர் அணியினரும் இணைந்து அ.தி.மு.க. அமோக வெற்றி பெற உறுதி எடுத்து உழைக்க வேண்டும்.

இவ்வாறு அவர் பேசினார்.

கலந்துகொண்டவர்கள்

கூட்டத்தில் நகர செயலாளர் விஜய பாண்டியன், பொதுக்குழு உறுப்பினர் ராமச்சந்திரன், மாவட்ட பஞ்சாயத்து முன்னாள் தலைவர் சத்யா, ஒன்றிய செயலாளர் அய்யாதுரை பாண்டியன், ஜவகர், செல்வகுமார், கோவில்பட்டி யூனியன் துணை தலைவர் பழனிச்சாமி, மாவட்ட ஜெயலலிதா பேரவை பொருளாளர் வேலுமணி, மாவட்ட இணைச்செயலாளர் நீலகண்டன், நகரச் செயலாளர் ஆபிரகாம் அய்யாதுரை, வர்த்தக அணி மாவட்ட செயலாளர் ராமர் உள்பட ஏராளமானவர்கள் கலந்து கொண்டனர்.