காளை முட்டியதில் காயமடைந்த விவசாயி சாவு

இலுப்பூர் அருகே ராப்பூசலில் கடந்த 2-ந்தேதி ஜல்லிக்கட்டு நடந்தது. இந்த ஜல்லிக்கட்டில் 800 காளைகளும், 177 மாடுபிடி வீரர்களும் கலந்து கொண்டனர். இந்த ஜல்லிக்கட்டில் மாடு முட்டியதில் மாடுபிடி வீரர்கள், பார்வையாளர்கள், மாட்டின் உரிமையாளர் என 30 பேர் காயம் அடைந்தனர். இதில் ஜல்லிக்கட்டை பார்க்க வந்த அன்னவாசல் அருகே உள்ள புரமலைப்புதூரை சேர்ந்த விவசாயி அண்ணாத்துரை (வயது 49) உள்பட 5 பேர் படுகாயமடைந்தனர். அவர்கள் மேல் சிகிச்சைக்காக புதுக்கோட்டை அரசு மருத்துவக்கல்லூரி மருத்துவமனையில் அனுமதிக்கப்பட்டிருந்தனர். இந்த நிலையில் அங்கு சிகிச்சை பெற்று வந்த அண்ணாத்துரை சிகிச்சை பலனின்றி பரிதாபமாக உயிரிழந்தார். இதுகுறித்து இலுப்பூர் போலீசார் வழக்குப்பதிவு செய்து விசாரணை நடத்தி வருகின்றனர்.