முன்விரோதத்தில் தகராறுஅரிவாளால் வெட்டியவர் கைது

மதுரை கீரைத்துறை பகுதியை சேர்ந்தவர் பாலகிருஷ்ணன் (வயது 44). இவரது வீட்டின் அருகே மாரியம்மன் கோவில் உள்ளது. அந்த கோவிலில் பூஜை செய்வது தொடர்பாக மனோகரன் தரப்பினருக்கும், அவருக்கும் முன்விரோதம் இருந்து வந்தது. இந்த நிலையில் பாலகிருஷ்ணன் வீட்டின் அருகே கருப்பசாமி (22) என்பவர் குடியிருந்து வருகிறார். அவர் மனோகரன் தரப்பிற்கு ஆதரவாக செயல்பட்டு வந்துள்ளார். இது குறித்து கேட்ட போது அவர்களுக்குள் தகராறு ஏற்பட்டு வந்தது. சம்பவத்தன்று தனியாக வந்த பாலகிருஷ்ணனை, கருப்பசாமி உள்ளிட்ட 4 பேர் கொண்ட கும்பல் வழிமறித்தது. பின்னர் அந்த கும்பல் அவரை அரிவாளால் வெட்டி விட்டு தப்பியது. இது குறித்து அவர் கீரைத்துறை போலீசில் புகார் அளித்தார். புகாரின் பேரில் போலீசார் வழக்குப்பதிவு செய்து கருப்பசாமியை கைது செய்தனர்.