சிறுத்தை தாக்கி தொழிலாளி படுகாயம்

மங்களூரு;

உடுப்பி மாவட்டம் கார்கலா தாலுகா முண்ட்கூர் அருகே உள்ள நானில்தார் கிராமத்தை சேர்ந்தவர் கிருஷ்ணா ஷெட்டி. தொழிலாளி. இவர் நேற்றுமுன்தினம் வீட்டில் தூங்கி கொண்டிருந்தார். இந்த நிலையில் அருகே உள்ள வனப்பகுதியில் இருந்து சிறுத்தை ஒன்று இரைதேடி கிராமத்திற்குள் புகுந்து உள்ளது.

அப்போது கிருஷ்ணா சத்தம் கேட்டு வெளியே வந்து பார்த்துள்ளார். இதில் அவரது வீட்டின் முன் நின்ற சிறுத்தை, கிருஷ்ணா மீது பாய்ந்து அவரது கழுத்து, முதுகு பகுதியில் கடித்து குதறியது. இதையடுத்து அந்த சிறுத்தை அங்கிருந்து வனப்பகுதிக்குள் ஓடிவிட்டது. சிறுத்தை தாக்கியதில் கிருஷ்ணா ஷெட்டி பலத்த காயம் அடைந்து உயிருக்கு போராடினார்.

இதையடுத்து அக்கம்பக்கத்தினர் விரைந்து வந்து அவரை மீட்டு சிகிச்சைக்காக கார்கலா அரசு ஆஸ்பத்திரியில் அனுமதித்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இதுபற்றிய தகவல் அறிந்ததும் வனத்துறை அதிகாரிகள் சம்பவ இடத்துக்கு விரைந்து வந்து பார்வையிட்டனர். பின்னர் சிறுத்தையை பிடிக்க நடவடிக்கை எடுக்கும்படி வனத்துறையினருக்கு கிராம மக்கள் கோரிக்கை விடுத்தனர்.