நாடாளுமன்ற மக்களவை தேர்தலுக்கு பின் நமோ நமோ கோஷம் முடிவுக்கு வரும்; மாயாவதி

கன்னோஜ்,

2019 நாடாளுமன்ற மக்களவை தேர்தல் 7 கட்டங்களாக நடந்து வருகிறது.  இதில் 3 கட்ட தேர்தல்கள் நடந்து முடிந்துள்ளன.  தேர்தலை முன்னிட்டு உத்தர பிரதேசத்தில் அகிலேஷ் யாதவ் தலைமையிலான சமாஜ்வாடி மற்றும் மாயாவதி தலைமையிலான பகுஜன் சமாஜ் கட்சிகள் கூட்டணி அமைத்து நாடாளுமன்ற மக்களவை தேர்தலை சந்திக்கின்றன.

இந்த தேர்தலுக்கான பிரசாரத்தில் முன்னாள் மாநில முதல் மந்திரிகளான அகிலேஷ் யாதவ் மற்றும் மாயாவதி ஆகிய இருவரும் இன்று நடந்த பேரணி ஒன்றில் ஒன்றாக கலந்து கொண்டனர்.  இதில், கூட்டத்தினரின் முன் மாயாவதி பேசும்பொழுது, இந்த தேர்தலுடன் நமோ நமோ என்ற கோஷம் முடிவுக்கு வரும் என கூறினார்.

அவர் தொடர்ந்து பிரசாரத்தில் காங்கிரஸ் கட்சியையும் சாடி பேசினார்.  மண்டல் கமிசனின் அறிக்கையை காங்கிரஸ் கட்சி அமல்படுத்தவில்லை.  காங்கிரஸ் ஆட்சியில் இருந்தபொழுது, பி.ஆர். அம்பேத்காருக்கு பாரத ரத்னா விருதினை வழங்கவில்லை என குற்றச்சாட்டு கூறினார்.

மத்தியில் உள்ள பா.ஜ.க. அரசு, ஏழை, ஒடுக்கப்பட்டோர், இளைஞர் மற்றும் விவசாயிகளுக்கு உயர்ந்த வாக்குறுதிகளை வழங்கி விட்டு அவற்றில் எதனையும் நிறைவேற்றவில்லை என்றும் கூறினார்.