ஐ.பி.எல்.: பழைய விதிமுறையை மீண்டும் கொண்டு வரும் பி.சி.சி.ஐ? சென்னை அணியின் ரசிகர்கள் மகிழ்ச்சி

மும்பை,

அடுத்த ஆண்டு (2025) ஐ.பி.எல்.தொடருக்கான மெகா ஏலம் இந்த ஆண்டு நடைபெற உள்ளது. இதனை முன்னிட்டு ஒவ்வொரு அணியிலும் ஏராளமான மாற்றங்கள் நடந்து வருகின்றன. இதனையொட்டி ஐ.பி.எல். நிர்வாகம் மற்றும் அணிகளின் உரிமையாளர்கள் பங்கேற்ற ஆலோசனை கூட்டம் மும்பையில் நடைபெற்றது.

இதில் அனைத்து ஐ.பி.எல். அணிகளின் உரிமையாளர்களும் கலந்து கொண்டனர். அந்தக் கூட்டத்தில் பெரும்பாலான அணிகள் 4க்கு பதிலாக 7 வீரர்களை தக்க வைக்க கோரிக்கை வைத்தன. அத்துடன் பெரும்பாலான அணிகள் மெகா ஏலத்திற்கு பதிலாக சிறிய ஏலம் நடத்துவதை விரும்புவதாகவும் தெரிவித்துள்ளன.

அந்தக் கூட்டத்தில் தங்களுடைய முன்னாள் கேப்டன் எம்.எஸ். தோனியை தக்க வைப்பதற்காக சென்னை அணி நிர்வாகம் பழைய விதிமுறையை மீண்டும் கொண்டு வருமாறு பிசிசிஐ-யிடம் கோரிக்கை வைத்தது. குறிப்பாக சர்வதேச கிரிக்கெட்டில் ஓய்வு பெற்ற வீரர்கள் 5 வருடங்களை தாண்டி விட்டால் அன்கேப்ட் (அறிமுக வீரர்) வீரர்களாக கருதப்படுவார்கள்.

அதாவது அந்த விதிமுறையின்படி ஓய்வு பெற்ற வீரர்கள் 5 வருடத்தை தாண்டி விட்டால் சர்வதேச கிரிக்கெட்டில் விளையாடாத வீரர்களாக கருதப்படுவார்கள். எனவே அவர்களை ரூ. 20 லட்சம் என்ற மிகவும் குறைந்த தொகைக்கு தக்க வைக்க முடியும். இந்த விதிமுறை கடந்த 2008 முதல் 2021 வரை நடைமுறையில் இருந்தது. இருப்பினும் 2021ஆம் ஆண்டு அந்த விதிமுறை நீக்கப்பட்டது.

ஆனால் தற்போது அந்த விதிமுறையை மீண்டும் கொண்டு வருமாறு பிசிசிஐ-யிடம் சென்னை சூப்பர் கிங்ஸ் நிர்வாகம் கோரிக்கை வைத்தது. அந்த விதிமுறையை பயன்படுத்தினால் ரூ.12 கோடிக்கு பதிலாக தோனியை, வெறும் ரூ. 20 லட்சத்திற்கு சி.எஸ்.கே. அணியால் தக்க வைக்க முடியும். எனவே தோனியை தக்க வைப்பதற்காக சி.எஸ்.கே. நிர்வாகம் அந்தப் பழைய விதிமுறையை கையிலெடுத்துள்ளது.

ஆனால் அதற்கு ஐதராபாத் அணியின் துணை உரிமையாளர் காவ்யா மாறன் உள்ளிட்ட எதிரணி உரிமையாளர்கள் எதிர்ப்பும் தெரிவித்தனர்.

இந்நிலையில் அந்த விதிமுறையை பிசிசிஐ மீண்டும் கொண்டு வருவதற்கு அதிக வாய்ப்புள்ளதாக தகவல் வெளியாகியுள்ளது.

இது குறித்து பிசிசிஐ நிர்வாகி தெரிவித்தது பின்வருமாறு:- "அந்த விதிமுறை மீண்டும் வருவதற்கு பிரகாசமான வாய்ப்புள்ளது. கடந்த மாதம் நடத்தப்பட்ட நீண்ட விவாதத்தில் அந்த விதிமுறை பற்றி பேசினோம். வீரர்கள் பற்றிய விதிமுறைகள் அறிவிக்கப்படும்போது அது மீண்டும் கொண்டு வர முடியும்" என்று கூறினார்.

இந்த அறிவிப்பால் சென்னை சூப்பர் கிங்ஸ் அணியின் ரசிகர்கள் மகிழ்ச்சியில் திளைத்துள்ளனர்.