3வது டி20 போட்டி; வெஸ்ட் இண்டீஸை வீழ்த்தி தொடரை கைப்பற்றிய இங்கிலாந்து

செயிண்ட் லூசியா,

இங்கிலாந்து கிரிக்கெட் அணி வெஸ்ட் இண்டீசில் சுற்றுப்பயணம் மேற்கொண்டு 5 போட்டிகள் கொண்ட டி20 தொடரில் ஆடி வருகிறது. இதில் முதல் இரு போட்டிகளில் இங்கிலாந்து வெற்றி பெற்று தொடரில் 2-0 என முன்னிலையில் இருந்தது. இரு அணிகளுக்கும் இடையிலான 3வது டி20 போட்டி இன்று நடைபெற்றது.

இதில் முதலில் பேட்டிங் செய்த வெஸ்ட் இண்டீஸ் அணி 20 ஓவர்களில் 8 விக்கெட்டை இழந்து 145 ரன்கள் மட்டுமே எடுத்தது. வெஸ்ட் இண்டீஸ் தரப்பில் ரோவ்மன் பவல் 54 ரன்கள் எடுத்தார். இங்கிலாந்து தரப்பில் சாகிப் மஹ்மூத், ஜேமி ஓவர்டன் தலா 3 விக்கெட்டுகள் வீழ்த்தினர்.

தொடர்ந்து 146 ரன் எடுத்தால் வெற்றி என்ற இலக்குடன் ஆடிய இங்கிலாந்து 19.2 ஓவர்களில் 7 விக்கெட்டை இழந்து 149 ரன் எடுத்து வெற்றி பெற்றது. இங்கிலாந்து தரப்பில் அதிகபட்சமாக சாம் கர்ரன் 41 ரன் எடுத்தார். இந்த வெற்றியின் மூலம் 5 போட்டிகள் கொண்ட தொடரை 3-0 என இங்கிலாந்து கைப்பற்றியது. இரு அணிகளுக்கும் இடையிலான 4வது போட்டி நாளை நடைபெறுகிறது.