நாளை மறுநாள் பூமிக்கு திரும்புகிறார் சுனிதா வில்லியம்ஸ்?

வாஷிங்டன்,

விண்வெளியில் அமைக்கப்பட்டுள்ள சர்வதேச விண்வெளி நிலையத்தில் தங்கி ஆய்வு செய்வதற்காக அமெரிக்க விண்வெளி நிறுவனமான நாசாவின் சார்பில் இந்திய வம்சாவளியை சேர்ந்த விண்வெளி வீராங்கனை சுனிதா வில்லியம்ஸ் கடந்த ஆண்டு ஜூன் மாதம் அங்கு அனுப்பி வைக்கப்பட்டார். அவருடன் நாசா விண்வெளி வீரர் புட்ச் வில்மோரும் சென்றார்.

ஆய்வு பணிகளை முடித்துவிட்டு 8 நாட்களில் பூமிக்கு திரும்பும் திட்டத்துடன் அவர்கள் விண்வெளிக்கு சென்றனர். ஆனால் அவர்கள் சென்ற போயிங் நிறுவனத்தின் ஸ்டார்லைனர் விண்கலத்தில் தொழில்நுட்ப கோளாறு ஏற்பட்டதால் அவர்களால் திட்டமிட்டபடி பூமிக்கு திரும்ப முடியாமல் போனது.

இதனையடுத்து வேறொரு விண்கலத்தை சர்வதேச விண்வெளி நிலையத்துக்கு அனுப்பி சுனிதா வில்லியம்ஸ் மற்றும் புட்ச் வில்மோரை பூமிக்கு அழைத்து வர நாசா எடுத்த அனைத்து முயற்சிகளும் தோல்வியை சந்தித்தன. இதனால் அவர்கள் இருவரும் மாதக்கணக்கில் சர்வதேச விண்வெளி நிலையத்தில் தங்க வேண்டிய சூழல் ஏற்பட்டது. சுனிதா வில்லியம்ஸ் மற்றும் புட்ச் வில்மோர் 9 மாதங்களுக்கும் மேலாக சர்வதேச விண்வெளி நிலையத்தில் சிக்கியுள்ளனர்.

இந்த நிலையில் கடந்த ஜனவரி மாதம் அமெரிக்க ஜனாதிபதியாக பதவியேற்ற டொனால்டு டிரம்ப், சர்வதேச விண்வெளி நிலையத்தில் சிக்கியுள்ள விண்வெளி வீரர்கள் இருவரையும் பத்திரமாக பூமிக்கு அழைத்துவர ஸ்பேஸ்எக்ஸ் நிறுவனத்தின் தலைமை நிர்வாக அதிகாரி எலான் மஸ்கின் உதவியை நாடினார்.

அதனை ஏற்றுக்கொண்ட எலான் மஸ்க் ஸ்பேஸ்எக்ஸ் நிறுவனத்தின் 'குரூ டிராகன்' விண்கலத்தில் சுனிதா வில்லியம்ஸ் மற்றும் புட்ச் வில்மோர் விரைவில் பூமிக்கு அழைத்து வரப்படுவார்கள் என உறுதியளித்தார். அதன்படி ஸ்பேஸ்எக்ஸ் நிறுவனத்தின் 'குரூ டிராகன்' விண்கலம் 'பால்கன்-9' ராக்கெட் மூலம் இந்திய நேரப்படி நேற்று முன்தினம் அதிகாலை விண்ணில் செலுத்தப்பட்டது.

அந்த விண்கலத்தில் அமெரிக்காவை சேர்ந்த ஆனி மெக்லைன், நிகோல் அயர்ஸ், ஜப்பானை சேர்ந்த டகுயா ஒனிஷி, ரஷியாவை சேர்ந்த கிரில் பெஸ்கோவ் ஆகிய 4 விண்வெளி வீரர்கள் அனுப்பி வைக்கப்பட்டனர். இதையடுத்து 'குரூ டிராகன்' விண்கலம் இந்திய நேரப்படி நேற்று காலை 11.15 மணியளவில் வெற்றிகரமாக சர்வதேச விண்வெளி நிலையத்தை சென்றடைந்தது. விண்கலம் சர்வதேச விண்வெளி நிலையத்துடன் இணைந்ததும் அதில் இருந்த விண்வெளி வீரர்கள் 4 பேரும் ஒவ்வொருவராக சர்வதேச விண்வெளி நிலையத்துக்குள் நுழைந்தனர்.

அவர்களை கண்டதும் ஏற்கனவே சர்வதேச விண்வெளி நிலையத்தில் இருக்கும் சுனிதா வில்லியம்ஸ், புட்ச் வில்மோர் மற்றும் பிற விண்வெளி வீரர்கள் உற்சாகமடைந்தனர். அவர்கள் புதிதாக வந்த விண்வெளி வீரர்கள் ஒவ்வொருவரையும் ஆரத்தழுவியும், கைகுலுக்கியும் வரவேற்றனர்.

தற்போது சென்றுள்ள விண்வெளி வீரர்கள் 4 பேரும் சில வாரங்கள் விண்வெளி நிலையத்தில் தங்கியிருந்து ஆய்வு செய்வார்கள் என்று தெரிகிறது. அதே வேளையில் 9 மாதங்களாக சர்வதேச விண்வெளி நிலையத்தில் தங்கியிருக்கும் சுனிதா வில்லியம்ஸ் மற்றும் புட்ச் வில்மோர் ஆகிய இருவரும் இந்த வாரத்துக்குள் 'குரூ டிராகன்' விண்கலத்தில் பூமிக்கு திரும்புவார்கள் என தெரிவிக்கப்பட்டு இருந்தது.

இந்த நிலையில், சுனிதா வில்லியம்ஸ் நாளை மறுநாள் (புதன்கிழமை) மாலை 3:27 மணிக்கு பூமி திரும்புவார் என்றும் ப்ளோரிடா பாலைவனத்தில் விண்கலம் தரையிறங்க உள்ளது என்றும் நாசா தெரிவித்துள்ளது. எதிர்பார்த்ததைவிட ஒரு நாளுக்கு முன்னதாக பூமிக்கு திரும்புகின்றனர். சுனிதா மற்றும் வில்மோருடன், நாசா விண்வெளி வீரர் நிக் ஹேக், ரஷ்யாவின் ரோஸ்கோஸ்மோஸ் விண்வெளி வீரர் அலெக்ஸாண்டர் கோர்புனோவ் ஆகியோரும் பூமிக்கு திரும்புகிறார்கள்.