தடைகளைத் தகர்த்து தமிழ்நாடு முன்னேறும் - மு.க.ஸ்டாலின்

சென்னை,

விழா நாட்களில் மட்டுமல்ல எல்லா நாட்களும் திருக்குறளைப்போற்றுவோம் என முதல்-அமைச்சரும் திமுக தலைவருமான மு.க.ஸ்டாலின் கூறியுள்ளார். இது குறித்து கட்சி தொண்டர்களுக்கு அவர் எழுதி உள்ள கடிதத்தில்,

குமரியில் காலத்தால் அழியாத காவியமாக நிலைப்பெற்றுவிட்ட திருவள்ளுவர் சிலை நிறுவி 25 ஆண்டுகள் நிறைவடைந்திருக்கிறது. திருவள்ளுவர் சிலை, ஆழிப்பேரலையை எதிர்கொண்டு உயர்ந்து நிற்பதுபோல தமிழ்நாடும் தடைகளைத் தகர்த்து முன்னேறும். திருக்குறளில் உள்ள அதிகாரங்களைத் துணையாகக் கொண்டு எதேச்சதிகாரத்தை வெல்வோம் என தொண்டர்களுக்கு முதல்-அமைச்சர் மு.க.ஸ்டாலின் கடிதம் எழுதி உள்ளார்.

தமிழ்நாட்டின் தலைநகரான சென்னையில் வள்ளுவர் கோட்டம் அமைத்துப் புகழ் சேர்த்த முன்னாள் முதல்-அமைச்சர் கருணாநிதி. தமிழ்நாடு அரசின் சார்பில் திருவள்ளுவர் ஆண்டுக் கணக்கை நடைமுறைப்படுத்தினார். குமரி முனையில் உள்ள பாறையில் திருக்குறளில் உள்ள அதிகாரங்களைக் குறிக்கின்ற வகையில் 133 அடி உயரத்திற்கான சிலையை நிறுவி, அதனைப் புத்தாயிரம் ஆண்டான 1-1-2000 அன்று வண்ண விளக்கொளியில் வான்புகழ் வள்ளுவர் மின்னிடும் வகையில் திறந்து வைத்தார். வானுயர் வள்ளவர் சிலை திறக்கப்பட்ட அந்த நொடியில் உங்களில் ஒருவனான நான் உள்பட அத்தனை பேரும் மெய்சிலிர்த்து நின்றோம்.

2004-ஆம் ஆண்டு டிசம்பர் 26-ஆம் நாள் ஆழிப்பேரலை எனும் சுனாமியின் தாக்குதல் இந்தோனேஷியாவில் தொடங்கி, தமிழ்நாட்டின் கடற்கரை நெடுகிலும் பெரும் பாதிப்பை உண்டாக்கியது. அந்த நேரத்தில், உடல்நலக்குறைவால் மருத்துவமனையில் இருந்த கருணாநிதி ஆழிப்பேரலையின் பாதிப்புகளை அறிந்ததும், 'திருவள்ளுவர் சிலை எப்படி இருக்கிறது?' என்று கேட்டார். சிலையின் தலை வரை ஆழிப்பேரலை தாக்கிய போதும். அதனை எதிர்கொண்டு எவ்வித சேதாரமுமின்றி கம்பீரமாக நின்றார் திருவள்ளுவர்.

கால் நூற்றாண்டு காலத்தைக் கடந்து, இன்னும் பல நூற்றாண்டுகள் நிலைத்து நிற்கவிருக்கும் திருவள்ளுவர் சிலைக்கு, பேரறிவுச் சிலை (Statue of Wisdom) எனப் பெயர்சூட்டி விழா எடுத்து மகிழ்கிறது நம் திராவிட மாடல் அரசு. 'பிறப்பொக்கும் எல்லா உயிர்க்கும்' என்கிற சமூகநீதித் தத்துவத்தை நமக்கு வழங்கிய பேராசான் வள்ளுவர். அவரது பேரறிவுச் சிலையின் வெள்ளிவிழா கன்னியாகுமரியில் டிசம்பர் 30, 31, மற்றும் ஜனவரி 1 ஆகிய நாட்களில் சிறப்போடு நடைபெறுகிறது. வெள்ளிவிழாவின் அடையாளமாக குமரியில் வள்ளுவர் சிலை அமைந்துள்ள பாறைக்கும், விவேகானந்தர் மண்டபம் அமைந்துள்ள பாறைக்கும் இடையே, இந்தியாவிலேயே முதல்முறையாக அமைக்கப்பட்டுள்ள கண்ணாடி இழைப் பாலத்தை நான் திறந்து வைக்க இருக்கிறேன்.

உயர்ந்து நிற்கும் திருவள்ளுவர் சிலைபோல தமிழ்நாடும் தமிழர்களும் நாளும் உயர்ந்திட வேண்டும், அதற்கேற்ப வள்ளுவர் வழங்கிய திருக்குறளின் நெறி போற்றி நாம் வாழவேண்டும். புத்தாயிரம் ஆண்டில் முன்னாள் முதல்-அமைச்சர் கருணாநிதியால் திறந்து வைக்கப்பட்டு, புத்தாண்டான 2025-இல் பேரறிவுச் சிலையாகப் பெயர் பெற்றுத் திகழும் திருவள்ளுவர் சிலை, ஆழிப்பேரலையை எதிர்கொண்டு உயர்ந்து நிற்பதுபோல தமிழ்நாடும் தடைகளைத் தகர்த்து முன்னேறும்! திருவள்ளுவர் வழங்கிய திருக்குறளில் உள்ள அதிகாரங்களைத் துணையாகக் கொண்டு எதேச்சாதிகாரத்தை வெல்வோம்! வள்ளுவம் போற்றி வாழ்க்கை சிறந்திட அனைவருக்கும் 2025 புத்தாண்டு நல்வாழ்த்துகள்.

இவ்வாறு அதில் கூறியுள்ளார்.