பா.ஜ.க.வின் தொடர்ச்சியான திட்டத்தை அமித்ஷா மீண்டும் வெளிப்படுத்தியுள்ளார் - எஸ்.டி.பி.ஐ. கட்சி விமர்சனம்

சென்னை,

அமித்ஷாவின் பேச்சு மற்றும் கடுமையான குடியேற்ற மசோதாவுக்கு கண்டனம் தெரிவிப்பதாக எஸ்.டி.பி.ஐ. கட்சி தெரிவித்துள்ளது. இது தொடர்பாக அக்கட்சியின் தேசிய பொதுச்செயலாளர் யாஸ்மின் பரூக்கி வெளியிட்டுள்ள அறிக்கையில் கூறியிருப்பதாவது;-

"மத்திய உள்துறை மந்திரி அமித்ஷாவின் பிளவுபடுத்தும் கருத்துகளையும், மக்களவையில் நிறைவேற்றப்பட்ட குடியேற்றம் மற்றும் வெளிநாட்டினர் மசோதா(2025)வின் பின்னணியில் உள்ள ஆபத்தான அரசியல் நோக்கங்களையும் எஸ்.டி.பி.ஐ. கட்சி கண்டிக்கிறது.

இந்தியா ஒரு 'தர்மசாலை' அல்ல என்று கூறியதன் மூலமும், ரோஹிங்கியாக்கள் மற்றும் வங்கதேசிகள் போன்ற பாதிக்கப்படக்கூடிய சமூகங்களை குறிவைத்ததன் மூலமும், இந்தியாவின் அரசியலமைப்பு கொள்கைகளையும், மனிதாபிமான கடமைகளையும் பலிகொடுத்து, தனது அரசியல் நலன்களுக்காக குடியேற்றத்தை ஆயுதமாக்கும் பாஜகவின் தொடர்ச்சியான திட்டத்தை அமித்ஷா மீண்டும் வெளிப்படுத்தியுள்ளார்.

இந்தியா நீண்ட காலமாக துன்புறுத்தப்பட்ட மக்களுக்கு புகலிடமாக இருந்து வருகிறது. திபெத்தியர்கள், இலங்கைத் தமிழர்கள் மற்றும் வன்முறையிலிருந்து தப்பியோடும் மற்றவர்களுக்கும் அடைக்கலம் வழங்கி வந்துள்ளது. ஆனால், அமித் ஷாவின் பேச்சு இந்த மரபை அழிக்க முயல்கிறது; அதற்கு பதிலாக பயத்தைப் பரப்புவதையும், வகுப்புவாத பிளவைத் தூண்டுவதையும் நோக்கமாகக் கொண்டுள்ளது. அவரது கருத்துகள் வெறும் தூண்டுதலாக மட்டுமின்றி, பிரிவினையைத் தூண்டுவதற்கும், எல்லை மேலாண்மையில் அரசின் தோல்வியை மறைப்பதற்கும், விலக்கு கொள்கைகள் மூலம் அதிகாரத்தை பலப்படுத்துவதற்கும் திட்டமிட்ட சைகையாகவும் உள்ளன.

குடியேற்றம் மற்றும் வெளிநாட்டினர் மசோதா(2025), சீர்திருத்தம் என்ற போர்வையில் மறைக்கப்பட்ட ஒரு பிற்போக்கு மற்றும் சர்வாதிகார சட்டமாகும். இது குடியேற்ற அதிகாரிகளுக்கு பரந்த, கட்டுப்பாடற்ற அதிகாரங்களை வழங்குகிறது; தெளிவற்ற மற்றும் வரையறுக்கப்படாத "தேசிய பாதுகாப்பு" அச்சுறுத்தல்களை காரணமாகக் காட்டி, நுழைவை தன்னிச்சையாக மறுக்க அனுமதிக்கிறது.

நியாயமான மேல்முறையீட்டு செயல்முறை இல்லாதது தவறான பயன்பாட்டிற்கு வழிவகுக்கிறது; இது முஸ்லிம்கள் மற்றும் பிற ஒடுக்கப்பட்ட குழுக்களை பெருமளவில் பாதிக்கிறது. இந்த மசோதா பாதுகாப்பைப் பற்றியது அல்ல; பாகுபாட்டை நிறுவனமயமாக்குவதற்கும், பாஜகவின் இந்துத்துவா சார்ந்த விலக்கு அணுகுமுறையை முன்னெடுப்பதற்காகவுமே உள்ளது.

"இந்த மசோதா, இந்தியாவை 2047 ஆம் ஆண்டுக்குள் வளர்ந்த நாடாக மாற்றும்" என்ற அமித்ஷாவின் கூற்று வெறும் வார்த்தை விளையாட்டு மட்டுமே. உண்மையில், இது வணிகங்கள், பல்கலைக்கழகங்கள் மற்றும் மருத்துவமனைகளுக்கு கடுமையான கண்காணிப்பு பொறுப்புகளை சுமத்துகிறது; இதனால் திறமைகள், சுற்றுலா மற்றும் முதலீடுகளை தடுக்கும் பய உணர்வை உருவாக்குகிறது. மேலும், அகதிகள் அல்லது புகலிடம் தேடுபவர்களுக்கு எந்த கட்டமைப்பையும் உருவாக்காமல், உலகளாவிய இடப்பெயர்வு நெருக்கடியின் போது இந்தியாவின் தார்மீக மற்றும் சர்வதேச பொறுப்புகளை கைவிடுகிறது.

எஸ்.டி.பி.ஐ. இந்த மசோதாவை உடனடியாக திரும்பப் பெற வேண்டும் அல்லது முழுமையான ஆய்விற்காக நாடாளுமன்ற கூட்டு குழுவிற்கு அனுப்ப வேண்டும் என கோருகிறது. இந்தியாவின் பன்முகத்தன்மை மீதான இந்த வெளிப்படையான தாக்குதலை மாநிலங்களவை நிராகரிக்க வேண்டும்; பாஜகவை அதன் பிளவு அரசியலுக்கு பொறுப்பேற்க வைக்க வேண்டும் என வலியுறுத்துகிறது.

மேலும், அமித் ஷா தனது ஆட்சேபனைக்குரிய கருத்துகளை திரும்பப் பெற்று, இந்தியாவின் உள்ளடக்கிய தன்மை மற்றும் நீதியின் பாரம்பரியத்தை குறைத்து மதிப்பிட்டதற்கு மன்னிப்பு கேட்க வேண்டும். அரசியலமைப்பு மதிப்புகளை உயர்த்திப் பிடிக்கும், ஒடுக்கப்பட்டவர்களை வரவேற்கும், பிளவு மற்றும் பாகுபாடு காட்டும் கொள்கைகளை எதிர்க்கும் ஒரு இந்தியாவை நோக்கிய உறுதிப்பாட்டில் எஸ்டிபிஐ கட்சி உறுதியாக உள்ளது."

இவ்வாறு அவர் அந்த அறிக்கையில் தெரிவித்துள்ளார்.