நார்வே செஸ் போட்டி: 5-வது சுற்றில் உலக சாம்பியன் கார்ல்செனை வீழ்த்தி முதலிடம் பிடித்தார் விஸ்வநாதன் ஆனந்த்!
நார்வே செஸ் போட்டி புள்ளிப்பட்டியலில் 52 வயதான விஸ்வநாதன் ஆனந்த் 10 புள்ளிகளுடன் தொடர்ந்து முதலிடத்தில் உள்ளார்.
ஸ்டாவஞ்சர்,
முன்னணி வீரர்கள் பங்கேற்றுள்ள கிளாசிக்கல் செஸ் போட்டி நார்வேயில் நடைபெற்று வருகிறது.கிளாசிக்கல் செஸ் தொடரின் 4-வது சுற்று ஆட்டத்தில் முன்னாள் உலக சாம்பியனான இந்திய வீரர் விஸ்வநாதன் ஆனந்த், அமெரிக்காவின் வெஸ்லி சோவை சந்தித்தார். இதில் ஆனந்த் தோல்வி அடைந்தார்.
கிளாசிக்கல் செஸ் போட்டியின், முதல் 3 சுற்றுகளில் தொடர்ச்சியாக வெற்றி கண்ட ஆனந்த் சந்தித்த முதல் தோல்வி இதுவாகும். இதனை தொடர்ந்து, 4-வது சுற்று முடிவில் விஸ்வநாதன் ஆனந்த் மற்றும் 'உலகின் நம்பர் ஒன்' வீரரான மாக்னஸ் கார்ல்சென் (நார்வே) ஆகியோர் தலா 8.5 புள்ளிகளுடன் முதலிடத்தில் இருந்தனர்.
இந்நிலையில், நார்வே கிளாசிக்கல் செஸ் போட்டியின் 5-வது சுற்று போட்டி நடைபெற்றது. அதில் 'உலகின் நம்பர் ஒன்' வீரரான மாக்னஸ் கார்ல்செனை இந்தியாவின் விஸ்வநாதன் ஆனந்த் எதிர்கொண்டார்.
பரபரப்பாக நடைபெற்ற இந்த 5-வது சுற்றில், 'உலகின் நம்பர் ஒன்' வீரரான மேக்னஸ் கார்ல்சனை, விஸ்வநாதன் ஆனந்த் வீழ்த்தினார். இதன்மூலம், நார்வே செஸ் போட்டியில் புள்ளிப்பட்டியலில் 52 வயதான விஸ்வநாதன் ஆனந்த் 10 புள்ளிகளுடன் தொடர்ந்து முதலிடத்தில் உள்ளார்.