மு.க.ஸ்டாலின் இறுதிகட்ட தேர்தல் பிரசார சுற்றுப்பயணம் திருவண்ணாமலையில் இன்று தொடங்குகிறார்

சென்னை, 

சட்டமன்ற தேர்தலை முன்னிட்டு தி.மு.க. மற்றும் கூட்டணி கட்சி சார்பில் ஒவ்வொரு தொகுதியிலும் நிறுத்தப்பட்டு இருக்கும் வேட்பாளர்களுக்கு ஆதரவு கேட்டு தி.மு.க. தலைவர் மு.க.ஸ்டாலின் தேர்தல் பிரசார சுற்றுப்பயணத்தை மேற்கொண்டு வருகிறார். தேர்தல் அடுத்த மாதம் (ஏப்ரல்) 6-ந் தேதி நடைபெற உள்ள நிலையில், மு.க.ஸ்டாலினின் இறுதிகட்ட தேர்தல் பிரசார சுற்றுப்பயண விவரத்தை தி.மு.க. தலைமைக் கழகம் நேற்று வெளியிட்டு இருக்கிறது.

அதன்படி, மு.க.ஸ்டாலின் இன்று (வியாழக்கிழமை) காலை 8.30 மணிக்கு திருவண்ணாமலையில் இறுதிகட்ட தேர்தல் பிரசார சுற்றுப்பயணத்தை தொடங்குகிறார். அங்கு திருவண்ணாமலை, செங்கம், கீழ்பென்னாத்தூர், கலசபாக்கம், போளூர், ஆரணி, செய்யார், வந்தவாசி தொகுதி வேட்பாளர்களை ஆதரித்து பிரசாரம் செய்கிறார். மாலை 3 மணிக்கு மைலம், செஞ்சி, திண்டிவனம் தொகுதி வேட்பாளர்களை ஆதரித்து செஞ்சியிலும், 4.30 மணிக்கு பல்லாவரம், ஆலந்தூர், சோழிங்கநல்லூர் வேட்பாளர்களை ஆதரித்து பல்லாவரத்திலும் பிரசாரம் மேற்கொள்கிறார்.

சேலத்தில் பொதுக்கூட்டம்

26-ந் தேதி (நாளை) ஸ்ரீரங்கம், திருச்சி மேற்கு, லால்குடி, திருச்சி கிழக்கு, திருவெறும்பூர், மணப்பாறை, மண்ணச்சநல்லூர், முசிறி, துறையூர் தொகுதி வேட்பாளர்களை ஆதரித்து ஸ்ரீரங்கத்திலும், கருர், அரவக்குறிச்சி, கிருஷ்ணராயபுரம், குளித்தலை தொகுதி வேட்பாளர்களை ஆதரித்து கரூரிலும், ஈரோடு மேற்கு, ஈரோடு கிழக்கு, பெருந்துறை, மொடக்குறிச்சி வேட்பாளர்களுக்கு ஆதரவு கேட்டு ஈரோடு மேற்கிலும் பிரசாரம் செய்ய இருக்கிறார்.

27-ந் தேதி (சனிக்கிழமை) அவர் போட்டியிடும் கொளத்தூர் தொகுதியிலும், சைதாப்பேட்டை, வேளச்சேரி, விருகம்பாக்கம் வேட்பாளர்களை ஆதரித்து சைதாப்பேட்டையிலும் பிரசாரம் மேற்கொள்கிறார்.

28-ந் தேதி (ஞாயிற்றுக்கிழமை) காங்கேயம், தாராபுரம், பல்லடம் தொகுதி வேட்பாளர்களை ஆதரித்து காங்கேயத்திலும், அந்தியூர், கோபிச்செட்டிப்பாளையம், பவானி, பவானிசாகர் தொகுதி வேட்பாளர்களை ஆதரித்து கோபிசெட்டிப்பாளையத்திலும் பிரசாரம் செய்கிறார். அன்றைய தினத்தில் மாலை 4 மணிக்கு சேலத்தில் மதசார்பற்ற முற்போக்கு கூட்டணி கட்சி தலைவர்கள் பங்கேற்கும் மாபெரும் பிரசாரம் பொதுக்கூட்டம் நடக்கிறது. அதில் கெங்கவல்லி, ஆத்தூர், ஏற்காடு, வீரபாண்டி, மேட்டூர், எடப்பாடி, சங்ககிரி, ஓமலூர், சேலம் மேற்கு, சேலம் வடக்கு, சேலம் தெற்கு தொகுதி வேட்பாளர்களை ஆதரித்து பிரசாரம் நடைபெறும்.

போடி நாயக்கனூரில் பிரசாரம்

29-ந் தேதி (திங்கட்கிழமை) ஜோலார்ப்பேட்டை, வாணியம்பாடி, ஆம்பூர், திருப்பத்தூர் தொகுதி வேட்பாளர்களை ஆதரித்து ஜோலார்ப்பேட்டையிலும், அணைக்கட்டு, காட்பாடி, வேலூர், கே.வி.குப்பம், குடியாத்தம் வேட்பாளர்களை ஆதரித்து அணைக்கட்டிலும், ராணிப்பேட்டை, அரக்கோணம், சோளிங்கர், ஆற்காடு தொகுதி வேட்பாளர்களுக்கு ஆதரவு கேட்டு ராணிப்பேட்டையிலும் பிரசாரம் செய்கிறார்.

30-ந் தேதி (செவ்வாய்க்கிழமை) கன்னியாகுமரி, நாகர்கோவில், குளச்சல் தொகுதி வேட்பாளர்களை ஆதரித்து ஆரல்வாய்மொழியிலும், ஆலங்குளம், சங்கரன்கோவில், வாசுதேவநல்லூர், தென்காசி, கடையநல்லூர் தொகுதி வேட்பாளர்களை ஆதரித்து ஆலங்குளத்திலும், ராஜபாளையம், ஸ்ரீவில்லிபுத்தூர், சாத்தூர், அருப்புக்கோட்டை, சிவகாசி, விருதுநகர், திருச்சுழி வேட்பாளர்களை ஆதரித்து ராஜபாளையத்திலும் பிரசாரம் மேற்கொள்ள உள்ளார்.

31-ந் தேதி (புதன்கிழமை) போடிநாயக்கனூர், பெரியகுளம், ஆண்டிப்பட்டி, கம்பம் வேட்பாளர்களை ஆதரித்து போடிநாயக்கனூரிலும், பழனி, ஆத்தூர், திண்டுக்கல், நிலக்கோட்டை, ஒட்டன்சத்திரம் தொகுதி வேட்பாளர்களை ஆதரித்து பழனியிலும், மடத்துக்குளம், உடுமலைப்பேட்டை, வால்பாறை தொகுதி வேட்பாளர்களை ஆதரித்து மடத்துக்குளத்திலும் பிரசாரம் செய்கிறார்.

கொளத்தூர் தொகுதி

1-ந் தேதி (வியாழக்கிழமை) மேட்டுப்பாளையம், உதகை, குன்னூர், கூடலூர் தொகுதி வேட்பாளர்களை ஆதரித்து மேட்டுப்பாளையத்திலும், கவுண்டம்பாளையம், சிங்காநல்லூர், கோவை வடக்கு, கோவை தெற்கு வேட்பாளர்களை ஆதரித்து கவுண்டம்பாளையத்திலும் பிரசாரம் மேற்கொள்ளும் மு.க.ஸ்டாலின், அன்று மாலை அவர் போட்டியிடும் கொளத்தூர் தொகுதியிலும், மயிலாப்பூர், தியாகராயநகர், ஆயிரம் விளக்கு தொகுதி வேட்பாளர்களை ஆதரித்து மயிலாப்பூர் தொகுதியிலும் பிரசாரம் மேற்கொள்ள இருக்கிறார்.

2-ந் தேதி (வெள்ளிக்கிழமை) ஜெயங்கொண்டம், அரியலூர், பெரம்பலூர், குன்னம் தொகுதியில் போட்டியிடும் வேட்பாளர்களுக்கு ஆதரவு கேட்டு ஜெயங்கொண்டத்திலும், குறிஞ்சிப்பாடி, கடலூர், புவனகிரி, சிதம்பரம், காட்டுமன்னார்கோவில் வேட்பாளர்களை ஆதரித்து வடலூரிலும், சீர்காழி, மயிலாடுதுறை, பூம்புகார் வேட்பாளர்களை ஆதரித்து சீர்காழியிலும் பிரசாரம் செய்கிறார்.

3-ந் தேதி (சனிக்கிழமை) வேதாரண்யம், கீழ்வேளூர், நாகப்பட்டினம், திருத்துறைப்பூண்டி தொகுதி வேட்பாளர்களை ஆதரித்து வேதாரண்யத்திலும், காரைக்கால் வடக்கு, காரைக்கால் தெற்கு, திருநள்ளாறு, நிரவி-திருப்பட்டினம், நெடுங்காடு வேட்பாளர்களை ஆதரித்து காரைக்காலிலும், அன்று மாலை புதுச்சேரியில் உள்ள வேட்பாளர்களை ஆதரித்தும் பிரசாரம் மேற்கொள்ள உள்ளார்.