கார் மோதி படுகாயம் அடைந்த தொழிலாளி சாவு

ஆலங்குடி எஸ்.எஸ். தெருவை சேர்ந்தவர் சிரில்ராஜ் (வயது 55), சுமை தூக்கும் தொழிலாளி. இவருடைய மனைவி சவுரியம்மாள். இவர்களுக்கு 2 மகள்கள் உள்ளனர். கடந்த 17-ந் தேதி ஆலங்குடி மணிப்பள்ளம் சாலையில் சிரில்ராஜ் சைக்கிளில் சென்று கொண்டு இருந்தார். அப்போது அந்த வழியாக சென்ற கார் சைக்கிள் மீது மோதியது. இந்த விபத்தில் தூக்கி வீசப்பட்ட சிரில்ராஜ் படுகாயம் அடைந்தார். இதனால் பீதியடைந்த டிரைவர் காரை நிறுத்தாமல் அங்கிருந்து தப்பி சென்றார். இதையடுத்து அந்த வழியாக சென்ற வாகன ஓட்டிகள் அவரை மீட்டு புதுக்கோட்டை அரசு மருத்துவக்கல்லூரி மருத்துவமனையில் சேர்த்தனர். அங்கு அவருக்கு டாக்டர்கள் தீவிர சிகிச்சை அளித்தனர். ஆனால் சிகிச்சை பலனின்றி சிரில்ராஜ் நேற்று பரிதாபமாக இறந்தார். இந்த சம்பவம் குறித்து ஆலங்குடி இன்ஸ்பெக்டர் அழகம்மை வழக்குப்பதிவு செய்து விபத்தை ஏற்படுத்திவிட்டு தப்பி ஓடிய கார் டிரைவரை வலைவீசி தேடி வருகிறார்.