தூத்துக்குடியில் பயங்கரம்: வாலிபர் சரமாரி வெட்டிக்கொலை

ஸ்பிக்நகர்:

தூத்துக்குடியில் மது குடிக்க அழைத்துச்சென்று வாலிபரை சரமாரியாக வெட்டிக்கொலை செய்த நண்பர்களை போலீசார் வலைவீசி தேடி வருகின்றனர்.

உப்பள தொழிலாளி

தூத்துக்குடி முள்ளக்காடு நேருஜி நகர் பகுதியைச் சேர்ந்தவர் செல்வம். இவருடைய மகன் அலெக்ஸ் என்ற சில்லி (வயது 25). இவர் அப்பகுதியில் உள்ள உப்பளத்தில் பண்டல் கட்டும் தொழிலாளியாக வேலை செய்து வந்தார்.

இவர் நேற்று மாலையில் தனது வீட்டில் இருந்தார். அப்போது அங்கு வந்த 2 நண்பர்கள், அலெக்சை மது குடிக்க அழைத்துச்சென்றனர்.

வெட்டிக்கொலை

முள்ளக்காடு தேவிநகரில் ஒதுக்குப்புறமான இடத்துக்கு சென்று அனைவரும் மது அருந்தினர். அப்போது அவர்களுக்கு இடையே திடீரென்று வாக்குவாதம் ஏற்பட்டது. இதில் ஆத்திரமடைந்த 2 நண்பர்களும் அரிவாளால் அலெக்சை சரமாரியாக வெட்டியதாக கூறப்படுகிறது.

இதில் கழுத்து, முதுகு உள்ளிட்ட பகுதிகளில் பலத்த வெட்டுக்காயம் அடைந்த அவர் சம்பவ இடத்திலேயே ரத்த வெள்ளத்தில் துடிதுடித்து பரிதாபமாக இறந்தார். பின்னர் நண்பர்கள் அங்கிருந்து தப்பி ஓடி விட்டனர்.

போலீசார் விசாரணை

இதுபற்றி அறிந்த அக்கம்பக்கத்தினர் அதிர்ச்சி அடைந்து முத்தையாபுரம் போலீசாருக்கு தகவல் தெரிவித்தனர். உடனே மாவட்ட போலீஸ் சூப்பிரண்டு பாலாஜி சரவணன், துணை போலீஸ் சூப்பிரண்டு சத்யராஜ், இன்ஸ்பெக்டர்கள் ராஜாராம், ஜெயசீலன் மற்றும் போலீசார் சம்பவ இடத்துக்கு விரைந்து சென்று பார்வையிட்டனர்.

கொலை நடந்த இடத்தில் பதிவான தடயங்களை கைரேகை நிபுணர்கள் பதிவு செய்தனர். போலீசாரின் மோப்ப நாய் ஜூனோ வரவழைக்கப்பட்டது. அது கொலை நடந்த இடத்தில் மோப்பம் பிடித்து விட்டு, அருகில் உள்ள காட்டுப்பகுதி வரையிலும் ஓடிச்சென்று திரும்பியது.

இறந்த அலெக்சின் உடலை போலீசார் கைப்பற்றி பிரேத பரிசோதனைக்காக தூத்துக்குடி அரசு ஆஸ்பத்திரிக்கு அனுப்பி வைத்தனர்.

நண்பர்களுக்கு வலைவீச்சு

இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.

போலீசாரின் முதல்கட்ட விசாரணையில், கடந்த ஆண்டு அப்பகுதியைச் சேர்ந்த ரமேஷ் என்பவரை கத்தியால் குத்திக் கொல்ல முயன்றதாக அலெக்ஸ் மீது வழக்கு நிலுவையில் உள்ளது. எனவே அந்த முன்விரோதத்தில் அலெக்சை நண்பர்கள் உதவியுடன் தீர்த்துக்கட்டினரா? அல்லது வேறு ஏதேனும் காரணமா? என்பன உள்ளிட்ட பல்வேறு கோணங்களில் போலீசார் தீவிர விசாரணை நடத்தி வருகின்றனர்.

தூத்துக்குடியில் வாலிபரை நண்பர்கள் மது குடிக்க அழைத்துச்சென்று சரமாரியாக வெட்டிக்கொலை செய்த சம்பவம் பெரும் பரபரப்பை ஏற்படுத்தியது.