வீட்டில் இருந்தபடியே மாணவர்கள் பயன்பெறும் வகையில்கல்வி தொலைக்காட்சியில் போட்டி தேர்வுகளுக்கான பயிற்சி வகுப்புகள் ஒளிபரப்பு கலெக்டர் தகவல்

கடலூர் மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தினால் பள்ளி, கல்லூரி மாணவ-மாணவிகளுக்கு தொழில்நெறி வழிகாட்டல் நிகழ்ச்சிகள், உயர்கல்வி மற்றும் வேலைவாய்ப்பு குறித்த நிகழ்ச்சிகள் நடத்தப்பட்டு வருகிறது. மேலும் இந்த அலுவலகத்தில் இயங்கி வரும் தன்னார்வ பயிலும் வட்டம் மூலமாக பல்வேறு அரசு பணிகளுக்கான போட்டித் தேர்வுகளுக்கான இலவச பயிற்சி வகுப்புகளும் நடத்தப்பட்டு வருகிறது.

இதன் தொடர்ச்சியாக வீட்டில் இருந்தபடியே போட்டித் தேர்வுகளுக்கு தயாராகும் மாணவ-மாணவிகள் பயன்பெறும் வகையில் மெய்நிகர் கற்றல் வலைதளம், வேலைவாய்ப்பு மற்றும் பயிற்சித்துறை வாயிலாக உருவாக்கப்பட்டு இயங்கி வருகிறது. அனைத்து போட்டித்தேர்வுக்கான விவரங்களையும் அந்த இணையதளம் உள்ளடக்கியது. போட்டித்தேர்விற்கான பாடத்திட்டங்கள், வினாத்தாள்கள், மாதிரித்தேர்வுகள், பாடக்குறிப்புகள் ஆகியவை உள்ளன. மெய்நிகர் கற்றலுக்கான www.tamilnadu careerservices.tn.gov.in என்ற இணையத்தளத்தில் போட்டித்தேர்விற்கு தயாராகும் மாணவர்கள் அனைவரும் பாடக்குறிப்புகள் மற்றும் வினாத்தாள்களை இலவசமாக பதிந்து, பதிவிறக்கம் செய்து கொள்ளலாம்.

கல்வி தொலைக்காட்சியில் ஒளிபரப்பு

இத்தளத்தின் வாயிலாக தமிழ்நாடு அரசு மற்றும் மத்திய அரசு தேர்வாணையங்களால் நடத்தப்படும் போட்டித் தேர்வுகளுக்கு தயாராகும் போட்டி தேர்வாளர்கள் பயன்பெறலாம். மேலும் கல்வி தொலைக்காட்சியில் போட்டித் தேர்வுகளுக்கான பயிற்சி வகுப்புகள் தொடங்கப்பட்டு ஊக்க உரைகள், முந்தைய ஆண்டுகளின் வினாத்தாள் பற்றிய கலந்துரையாடல், நடப்பு நிகழ்வுகள், போட்டித் தேர்வு வகுப்புகள் ஆகிய பல்வேறு நிகழ்ச்சிகளை தினமும் கல்வி தொலைக்காட்சியில் காலை 7 மணியில் இருந்து 9 மணி வரையும், இதன் மறு ஒளிபரப்பு இரவு 7 மணியில் இருந்து 9 மணி வரையும் ஒளிபரப்பு செய்யப்படுகின்றன.

எனவே, கடலூர் மாவட்டத்தில் உள்ள அரசு போட்டித் தேர்வுகளுக்கு தயாராகும் இளைஞர்கள் இதனை பயன்படுத்தி அரசு பணியிடங்களுக்கான போட்டித் தேர்வுகளில் அதிகளவில் பங்கேற்று பயன்பெறலாம். மேற்கண்ட தகவல் கலெக்டா் பாலசுப்பிரமணியம் தொிவித்துள்ளாா்.