வாய்த்தகராறை கண்டித்த 2 போலீஸ்காரர்களுக்கு அடி-உதை; 2 பேர் கைது

சென்னை மாதவரம் போலீஸ் நிலையத்தில் பணியாற்றும் போலீஸ் ஏட்டுகளான தியாகராஜன் மற்றும் ரகு ஆகியோர் சென்னை மூலக்கடை சந்திப்பில் ரோந்து பணியில் ஈடுபட்டிருந்தனர். அப்போது அங்குள்ள டாஸ்மாக் கடையில் மது அருந்திவிட்டு 2 பேர் குடிபோதையில் வாய்த்தகராறில் ஈடுபட்டு இருந்தனர். இதனை ரோந்து பணியில் ஈடுபட்டு இருந்த ஏட்டுகள் இருவரும் கண்டித்தனர். மேலும் 2 பேரையும் அங்கிருந்து கலைந்து செல்லும்படியும் அறிவுறுத்தினர். இதில் ஆத்திரம் அடைந்த 2 பேரும் சேர்ந்து போலீஸ் ஏட்டுகள் தியாகராஜன் மற்றும் ரகு ஆகிய 2 பேரையும் சரமாரியாக அடித்து உதைத்தனர். மேலும் தகாத வார்த்தைகளாலும் திட்டியதாக தெரிகிறது.

இது குறித்து ஏட்டுகள் அளித்த புகாரின்பேரில் மாதவரம் போலீஸ் இன்ஸ்பெக்டர் சிவகுமார் வழக்குப்பதிவு செய்து போலீஸ் ஏட்டுகளை தாக்கியதாக கொளத்தூர் பாலாஜி நகரை சேர்ந்த கோவிந்தராஜ் (வயது 25) மற்றும் பாலாஜி (25) ஆகிய 2 பேரையும் கைது செய்து விசாரித்து வருகிறார்.