தரமான விதைகள், இடு பொருட்களை 'அக்ரிகார்ட்' இணைய தளம் மூலம் பெறலாம்

பட்டுக்கோட்டை:

தரமான விதைகள், இடு பொருட்களை 'அக்ரிகார்ட்' இணைய தளம் மூலம் பெறலாம் என தஞ்சை மாவட்ட விதை ஆய்வு துணை இயக்குனர் விநாயக மூர்த்தி தெரிவித்துள்ளார்.

இதுகுறித்து அவர் வெளியிட்டுள்ள செய்திக்குறிப்பில் கூறியிருப்பதாவது:-

ஆன்லைன் வர்த்தகம் அறிமுகம்

வேளாண் விளைபொருட்களை நேரடியாக பொதுமக்களிடம் கொண்டு சேர்த்து விவசாயிகளின் வருமானத்தை அதிகரிக்கவும், விவசாயிகளுக்கு உற்பத்தி சார்ந்த பொருட்களை எளிதாக கொள்முதல் செய்ய உதவவும், 'டி.என்.எ.யு. அக்ரி கார்ட்' ஆன்லைன் வர்த்தக சேவையை கோவை தமிழ்நாடு வேளாண்மைப் பல்கலைக்கழகத்தில் கடந்த 14-ந்தேதி முதல் தொடங்கப்பட்டுள்ளது.

பொதுமக்கள் மற்றும் விவசாயிகள் https://www.tnauagricart.com என்ற இணையதளத்தை பயன்படுத்தி வேளாண் சார்ந்த பொருட்களை பெற்றுக்கொள்ளலாம். முதல்கட்டமாக, 15 வகையான பொருட்கள் விற்பனை செய்யப்படுகிறது. தொடர்ந்து, நூற்றுக்கும் மேற்பட்ட பொருட்கள் அறிமுகப்படுத்தப்படும்.

வேளாண் பொருட்கள்

மதிப்பு கூட்டப்பட்ட வேளாண் பொருட்களும் விற்பனை மேற்கொள்ள உள்ளது. இந்த இணையதளம் வாயிலாக, நெல், மக்காச்சோளம், பயிறு வகை, எண்ணெய் வித்து, பயிர் பூஸ்டர்கள், இடுபொருட்கள் காய்கறி விதைகளை ஆர்டர்' செய்து, உரிய கட்டணம் செலுத்தி வீட்டு முகவரிலேயே பெற்றுக்கொள்ளலாம்.

விவசாயத்தில் நல்ல மகசூல் கிடைக்க வேண்டுமானால், நல்ல தரமான விதைகளின் பயன்பாடு முக்கியம். உற்பத்தி செய்து, இருப்பில் விற்பனைக்கு தயாரான தரமான விதைகளை விவசாயிகள் வாங்குவதற்கு வசதியாக மேற்குறிப்பிட்ட தமிழ்நாடு வேளாண்மை பல்கலைக்கழக முகவரியில் விவரங்களை தெரிந்துகொள்ளலாம்.

தரமான விதைகள்

விவசாயிகள் மற்றும் பொதுமக்கள் இந்த இணையதளம் மூலம் பருவத்திற்கு மற்றும் தங்களின் தேவைக்கு ஏற்ற தமிழ்நாடு வேளாண்மைப் பல்கலைக்கழகத்தில் உற்பத்தி செய்யப்படும் தரமான நெல் விதைகள், மக்காச்சோளம், டி.என்.எ.யு. காய்கறி விதை பாக்கெட், எண்ணெய் வித்துகள், பயிர் பூஸ்டர்கள், உயிரியல் இடுபொருட்கள் போன்றவற்றை வாங்குவதற்கு வசதியாக 'டி.என்.எ.யு அக்ரிகார்ட்' இணைய தளமூலம் பெற்று பயன் அடையலாம்.

இவ்வாறு அதில் கூறப்பட்டுள்ளது.