தனியார் பஸ் லாரி நேருக்கு நேர் மோதி விபத்து - 6 பேர் படுகாயம்

பனமரத்துப்பட்டி,

சேலம் மாவட்டம், பனமரத்துப்பட்டி அருகே உள்ள குரால்நத்தம் கிராமம் பெரியூர்கல்மேடு பகுதியில் இன்று காலை 11 மணி அளவில் ஆத்தூரில் இருந்து சேலம் நோக்கி தனியார் பஸ் ஒன்று வந்து கொண்டிருந்தது. பஸ்சை தும்பல்பட்டி கிராமம் இரட்டைபுலிபுதூர் பகுதியை சேர்ந்த மணிகண்டன் (வயது 35 ) என்பவர் ஓட்டி வந்தார்.

அப்போது பனமரத்துப்பட்டியில் இருந்து குரால்நத்தம் நோக்கி வேகமாக வந்த டிப்பர் லாரி எதிர்பாராத விதமாக தனியார் பஸ் மீது நேருக்கு நேர் மோதியது. இந்த விபத்தில் லாரி டிரைவர் துரைமுருகன் (27), பஸ் டிரைவர் மணிகண்டன், நடத்துனர் செங்கோட்டையன்(47), பயணிகள் மகேஸ்வரி(45), செல்லம்மாள் (47), செந்தில்குமார் (44) உள்ளிட்ட ஆறு பேர் பலத்த காயம் அடைந்தனர்.

விபத்து குறித்து தகவல் அறிந்து வந்த பனமரத்தப்பட்டி போலீசார் சம்பவ இடத்திற்கு விரைந்து வந்து விபத்தில் சிக்கியவர்களை மீட்டு சிகிச்சைக்காக அரசு மருத்துவமனைக்கு அனுப்பி வைத்தனர். இதில் பலத்த காயம் அடைந்த லாரி டிரைவர் துரைமுருகன் (27) உயிருக்கு ஆபத்தான நிலையில் சிகிச்சைக்காக சேலம் அரசு மருத்துவமனைக்கு அனுப்பி வைக்கப்பட்டார். மேலும், இது தொடர்பாக வழக்குப்பதிவு செய்து விசாரணை மேற்கொண்டு வருகின்றனர்.