வன விலங்குகளை வேட்டையாட சென்ற 2 பேருக்கு அபராதம்

கடையநல்லூர்:

கடையநல்லூர் வனச்சரக அலுவலர் சுரேஷ் தலைமையில் மேக்கர் பிரிவு வனவர் அம்பலவாணன், கடையநல்லூர் பிரிவு வனவர் முருகேசன் மற்றும் வனக்காப்பாளர்கள் வேட்டை தடுப்பு காவலர்கள் ஆகியோர் நேற்று முன்தினம் ஆய்க்குடி பீட்டில் ரோந்து பணியில் ஈடுபட்டனர். அப்போது அச்சன்புதூரைச் சேர்ந்த கணேசன் மகன் கார்த்திக் (வயது 19), முருகேசன் மகன் சதீஷ் (19) ஆகியோர் வனவிலங்குகளை வேட்டையாட சென்றனர்.

வனத்துறை அதிகாரிகளை கண்டதும் மோட்டார் சைக்கிளில் தப்பி ஓடி தலை மறைவானார்கள். இவர்களை நேற்று அச்சன்புதூர் ரோட்டில் வைத்து வனத்துறையினர் கைது செய்தனர்.

பின்னர் விசாரணை செய்து மோட்டார் சைக்கிள், நெற்றி லைட் ஆகியவற்றுடன் வன உயிரின வேட்டைக்குச் சென்ற குற்றத்திற்காக இருவருக்கும் தலா ரூ.20 ஆயிரம் அபராதம் விதித்தனர்.