புரட்டாசி சனிக்கிழமைகளில் சேவை நேரம் அறிவிப்பு

108 வைணவத் திருத்தலங்களில் முதன்மையானது ஸ்ரீரங்கம் ரெங்கநாதர் கோவில். பூலோக வைகுண்டம் என்று போற்றப்படும் ஸ்ரீரங்கம் ரெங்கநாதர் கோவிலில் புரட்டாசி சனிக்கிழமைகளில் பெருமாளை தரிசனம் செய்வது, அனைத்து திவ்யதேச பெருமாளையும் தரிசனம் செய்ததற்கு சமம் என்பது ஐதீகம். இதனால் தமிழகம் மட்டுமல்லாமல், வெளிமாநிலத்தில் இருந்தும் ஏராளமான பக்தர்கள் ஸ்ரீரங்கம் வந்து செல்வார்கள்.

இந்த ஆண்டு புரட்டாசி மாத சனிக்கிழமைகளில் நம்பெருமாள் (ரெங்கநாதர்) சேவை நேர விவரங்கள் கோவில் நிர்வாகத்தால் வெளியிடப்பட்டுள்ளது. அதன்படி, புரட்டாசி சனிக்கிழமையான வருகிற 24-ந்தேதி, அடுத்த மாதம்(அக்டோபர்) 1-ந்தேதி, 8-ந்தேதி ஆகிய நாட்களில் காலை 6 மணி முதல் 12 மணி வரையும், மாலை 2 மணி முதல் மாலை 5.30 மணி வரையும், மாலை 6.45 மணி முதல் இரவு 9 மணி வரையும் சேவை நேரம் ஆகும். இந்த நாட்களில் விஸ்வரூபம், பொதுஜன சேவை இல்லை. அதேபோல் பகல் 12 மணி முதல் பகல் 2 மணி வரையும், மாலை 5.30 மணி முதல் மாலை 6.45 மணி வரையும் பூஜா காலம் என்பதால் சேவை கிடையாது.

மேலும் அடுத்த மாதம் 15-ந்தேதி காலை 6 மணி முதல் 12 மணி வரையும், மாலை 2 மணி முதல் மாலை 4 மணி வரையும், மாலை 5.30 மணி முதல் இரவு 8.30 மணி வரையும் சேவை நேரம் ஆகும். பகல் 12 மணி முதல் பகல் 2 மணி வரையும் பூஜா காலம் என்பதால் சேவை இல்லை. மாலை 4 மணி முதல் மாலை 5.30 மணி வரை பூஜா காலம் மற்றும் புறப்பாடு நடைபெறும். மேற்கண்ட 4 சனிக்கிழமைகளிலும் விஸ்வரூபம் பொதுஜன சேவை இல்லை என்று கோவில் இணை ஆணையர் மாரிமுத்து தெரிவித்துள்ளார்.