சித்தோடு அருகே பஸ் மோதி முதியவர் சாவு

பவானி

சித்தோடு அடுத்த நசியனூர் அப்பத்தாள் கோவில் அருகே நான்கு வழி சாலை உள்ளது. இங்கு கடந்த 5-ந்தேதி 60 வயது மதிக்கத்தக்க முதியவர் ஒருவர் சாலையை கடக்க முயன்றார். அப்போது கோவையில் இருந்து சேலம் நோக்கி வந்த அரசு பஸ் எதிர்பாராத விதமாக அவர் மீது மோதியது. இதில் அவர் தூக்கி வீசப்பட்டு படுகாயம் அடைந்தார். உடனே அக்கம் பக்கத்தினர் அவரை மீட்டு சிகிச்சைக்காக தனியார் ஆம்புலன்ஸ் மூலம் ஈரோடு அரசு ஆஸ்பத்திரிக்கு அனுப்பி வைத்தனர். ஆனால் அவர் செல்லும் வழியிலேயே இறந்து விட்டார். இதுகுறித்து தகவல் அறிந்து வந்த சித்தோடு போலீசார் முதியவரின் உடலை கைப்பற்றி ஈரோடு அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர். மேலும் இறந்த முதியவர் யார்? அவர் எந்த பகுதியை சேர்ந்தவர் என்ற விவரங்கள் தெரியவில்லை. இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.