பீர் பாட்டிலால் தாக்கி டிரைவர் கொலை

மதுரையில் நள்ளிரவில் பீர் பாட்டிலால் தாக்கி டிரைவரை கொலை செய்த 5 பேரை போலீசார் கைது செய்தனர்.

டிரைவர்

மதுரை கரிமேடு பொன்னகரம் தெருவை சேர்ந்தவர் முத்துபாண்டி. இவரது மகன் ராஜபாண்டி (வயது 24). இவர் அதே பகுதியில் உள்ள டிராவல்ஸ் நிறுவனத்தில் டிரைவராக வேலை பார்த்து வந்தார். இவர் அடிதடி சம்பவங்களில் ஈடுபட்டு வந்துள்ளதால் இவர் மீது சில வழக்குகள் உள்ளன. நேற்றுமுன்தினம் இரவு ராஜபாண்டி தனது நண்பர்களான வெங்கடேஷ், பிரசன்னா ஆகியோருடன் மதுரை கோட்ஸ் பாலத்தின் கீழ் பகுதியில் அமர்ந்து மது குடித்தார்.

அப்போது மேலப்பென்னகரம் 4-வது தெருவை சேர்ந்த மனோஜ் சிவா (22) என்பவர் பிரசன்னாவுடன் செல்போனில் பேசிய போது வாக்குவாதம் ஏற்பட்டது. இதை அறிந்த ராஜபாண்டி தனது நண்பருக்காக செல்போனில் மனோஜ்சிவாவுடன் பேசி, தங்களை எதிர்த்தால் கொலை செய்து விடுவதாக மிரட்டியுள்ளார். இதனால் ஆத்திரம் அடைந்த மனோஜ்சிவா சம்பவ இடத்திற்கு 6 பேருடன் நள்ளிரவு வந்தார்.

பீர் பாட்டிலால் தாக்கி கொலை

மோட்டார்சைக்கிளில் வீட்டிற்கு கிளம்பி கொண்டிருந்த ராஜபாண்டியை அவர்கள் கீழே தள்ளி தகராறு செய்தனர். பின்னர் அந்த கும்பல் அவரை உருட்டுக்கட்டை மற்றும் பீர் பாட்டிலால் சரமாரியாக தாக்கியது. அவர்களை பிரசன்னா, வெங்கடேஷ் ஆகியோர் தடுத்தனர். ஆனாலும் ஆத்திரம் தீராத மனோஜ் சிவா உள்ளிட்டோர் அங்கு கிடந்த பாறாங்கல்லை எடுத்து ராஜபாண்டியின் தலையில் போட்டனர். படுகாயமடைந்த அவர் சம்பவ இடத்திலேயே பலியானார். பின்னர் அவர்கள் 6 பேரும் அங்கிருந்து தப்பி சென்று விட்டனர். இதுகுறித்து தகவல் அறிந்ததும் கரிமேடு போலீசார் அங்கு சென்று ராஜபாண்டியின் உடலை மீட்டு பரிசோதனைக்காக அனுப்பி வைத்தனர்.

5 பேர் கைது

பின்னர் போலீசார் விசாரணை நடத்தி மனோஜ்சிவா, செல்லூர் களத்து பொட்டல் பர்மா காலனி கிருஷ்ணகுமார் என்ற கிட்டு (26), பொன்னகரம் பிராட்வே தெரு ஸ்ரீமணிகண்டன் (20), பொன்னகரம் லோகேஷ் (20), பெத்தானியாபுரம் தங்கபாண்டி (19), சிம்மக்கல் கண்ணன் (23) ஆகிய 6 பேர் மீது வழக்குப்பதிவு செய்து அவர்களை தேடி வந்தனர். இந்த நிலையில் அந்த பகுதியில் பதுங்கியிருந்த மனோஜ்சிவா உள்ளிட்ட 5 பேரை போலீசார் கைது செய்தனர். மேலும் தலைமறைவாக உள்ள கிருஷ்ணகுமாரை தேடி வருகிறார்கள்.

கொலை செய்யப்பட்ட ராஜபாண்டிக்கு திவ்யா என்ற மனைவி உள்ளார். நிறைமாத கர்ப்பிணியாக உள்ள அவர் தற்போது பிரசவத்திற்காக தனது தாய் வீட்டிற்கு சென்றிருந்தார். அவரை பார்த்து விட்டு இரவு நண்பர்களை பார்க்க வந்து மது குடித்த போதுதான் இந்த கொலை சம்பவம் நடந்ததாக போலீசார் தெரிவித்தனர்.