மொபட் திருட்டு; பள்ளி மாணவர்கள் கைது

களக்காடு:

களக்காடு ஆற்றங்கரை தெருவை சேர்ந்தவர் ஐசக் துரை பாக்கியராஜ் (வயது 59). இவர் களக்காடு புதிய பஸ் நிலையத்தில் உள்ள மிட்டாய் கடையில் வேலை பார்த்து வருகிறார். சம்பவத்தன்று அவர் தனது மொபட்டை பஸ் நிலையத்தின் உள்புறம் நிறுத்தி விட்டு, கடைக்கு சென்றார். பின்னர் சென்று பார்த்த போது மொபட்டை காணவில்லை. அதனை மர்ம நபர்கள் திருடி சென்றதை அறிந்த அவர் இதுபற்றி களக்காடு போலீசில் புகார் செய்தார். சப்-இன்ஸ்பெக்டர் ரெங்கசாமி வழக்குப்பதிவு செய்து விசாரணை நடத்தினார்.

மேலும் அங்குள்ள கண்காணிப்பு கேமராவில் பதிவான காட்சிகளை ஆய்வு செய்த போது, பள்ளி சீருடை அணிந்த 2 பேர் மொபட்டை திருடி சென்றது தெரியவந்தது. அதன்பேரில் நடத்திய விசாரணையில் களக்காடு மற்றும் நாங்குநேரியை சேர்ந்த 10-ம் வகுப்பு மாணவர்கள் 2 பேர் மொபட்டை திருடியது தெரியவந்தது. இதையடுத்து 2 பேரையும் போலீசார் கைது செய்து, நெல்லை சிறுவர் சீர்திருத்த பள்ளியில் அடைத்தனர்.