மாவட்ட திட்டக்குழு உறுப்பினர்கள் தேர்தல்

மாவட்ட திட்டக்குழு உறுப்பினர்கள் தேர்தல் வருகிற 23-ந் தேதி நடக்கிறது என்று கலெக்டர் விஷ்ணு சந்திரன் தெரிவித்துள்ளார்.

திட்டக்குழு உறுப்பினர்கள் தேர்தல்

ராமநாதபுரம் மாவட்ட திட்டக்குழு உறுப்பினர்கள் தேர்தல் இந்த மாதம் 23-ந் தேதி நடைபெற உள்ளது. ராமநாதபுரம் மாவட்டத்தில் ஊரக மற்றும் நகர்புற உள்ளாட்சி அமைப்புகளில் திட்டக்குழு உறுப்பினர்களுக்கான தேர்தலில் ஊரக பகுதிகளில் மாவட்ட கவுன்சிலர்களும், நகர்புற அமைப்புகளில் நகராட்சி மற்றும் பேரூராட்சி கவுன்சிலர்களும் வாக்களிக்க உள்ளனர். ஊரகத்திற்கு 9 திட்டக்குழு உறுப்பினர்களும், நகர்புறத்திற்கு 3 திட்டக்குழு உறுப்பினர்களும் தேர்தல் மூலமாக தேர்ந்தெடுக்கப்பட உள்ளனர்.

இந்த தேர்தலுக்கு நேற்று முதல் வருகிற 10-ந் தேதி வரை காலை 11 மணி முதல் பிற்பகல் 3 மணி வரை வேட்பு மனுக்கள் பெற்றுக்கொள்ளப்படும். ஊரக பகுதிகளுக்கான வேட்புமனுக்களை ஊராட்சி உதவி இயக்குனரிடமும், நகர்புற பகுதிகளுக்கான வேட்புமனுக்களை நகர்புற உதவி திட்ட அலுவலரிடமும் தாக்கல் செய்யலாம்.

வாக்கு எண்ணிக்கை

வேட்புமனுக்கள் 12-ந் தேதி பரிசீலிக்கப்படும். 14-ந் தேதி பிற்பகல் 3 மணி வரை வேட்புமனுக்களை திரும்ப பெற்றுக்கொள்ளலாம். இந்த பதவிகளுக்கு போட்டி ஏற்பட்டால் 23-ந் தேதி காலை 10 மணி முதல் பிற்பகல் 3 மணி வரை ஊரக மற்றும் நகர்புற பகுதிகளுக்கு கலெக்டர் அலுவலக கூட்ட அரங்கில் தேர்தல் நடைபெறும். தேர்தல் முடிந்தவுடன் பிற்பகல் 3 மணிக்கு வாக்கு எண்ணிக்கை நடைபெறும்.

புதிதாக தேர்ந்தெடுக்கப்பட்ட உறுப்பினர்கள், அரசு அறிவிக்கும் நாளிலிருந்து அவர்கள் தேர்ந்தெடுக்கப்பட்டுள்ள உள்ளாட்சி அமைப்பின் காலம் முடியும் வரை திட்டக்குழு உறுப்பினராக பதவி வகிப்பார்கள். இந்த தகவலை மாவட்ட தேர்தல் அலுவலரான கலெக்டர் விஷ்ணு சந்திரன் தெரிவித்துள்ளார்.