255 மாணவர்களிடம் இருந்து கல்வி கடன் விண்ணப்பங்கள்

விருதுநகர் மாவட்டத்தில் நடைபெற்ற சிறப்பு முகாம் மூலம் 255 மாணவர்களிடம் இருந்து கல்வி கடன் பெறுவதற்கான விண்ணப்பங்கள் பெறப்பட்டுள்ளன.

சிறப்பு முகாம்

விருதுநகர் மாவட்டத்தை சேர்ந்த கல்லூரி மாணவ-மாணவிகள் பயன்பெறும் வகையில் மாவட்டத்தில் முன்னோடி வங்கி மற்றும் அனைத்து வங்கிகளின் சார்பில் சிறப்பு கல்வி கடன் முகாம் 2 நாட்கள் நடைபெற்றது. கடந்த 21-ந் தேதி 9 தாலுகாவிலும், நேற்று சிவகாசி தாலுகாவிலும் சிறப்பு முகாம் நடைபெற்றது.

9 தாலுகாக்களில் நடைபெற்ற சிறப்பு முகாமில் 156 மாணவ-மாணவிகளிடமிருந்து ரூ. 4 கோடியே 86 லட்சத்து 6 ஆயிரம் மதிப்பிலான கல்வி கடன் பெறுவதற்கான விண்ணப்பம் பெறப்பட்டது. மேலும் 15 மாணவ-மாணவிகளுக்கு ரூ.75 லட்சத்து 34 ஆயிரம் உடனடி கல்வி கடன் வழங்குவதற்கான ஆணை வழங்கப்பட்டது.

கல்வி கடன்

மேலும் சிவகாசி தாலுகாவில் நடைபெற்ற முகாமில் 99 மாணவ-மாணவிகளிடம் இருந்து ரூ. 4 கோடியே 80 லட்சத்து 74 ஆயிரம் மதிப்புள்ள கல்வி கடன் வேண்டி விண்ணப்பம் பெறப்பட்டது. மேலும் 14 மாணவ-மாணவிகளுக்கு உடனடி கல்வி கடனாக ரூ. 99 லட்சத்து 12 ஆயிரம் வழங்குவதற்கான ஆணைகள் வழங்கப்பட்டது.

ஆக மொத்தம் மாவட்டத்தில் நடைபெற்ற கல்வி கடன் முகாம்களில் 255 மாணவ-மாணவிகளிடம் இருந்த ரூ.9 கோடியே 66 லட்சத்து 80 ஆயிரம் மதிப்பிலான கல்வி கடன் பெற வேண்டி விண்ணப்பம் பெறப்பட்டது. இதில் 29 மாணவ-மாணவிகளுக்கு உடனடி கல்விக்கடனாக ரூ.1 கோடியே 74 லட்சத்து 46 ஆயிரம் கல்வி கடன் வழங்குவதற்கான ஆணைகள் வழங்கப்பட்டது.

மேற்கண்ட தகவலை கலெக்டர் மேகநாதரெட்டி கூறினார்.