ஏர்வாடி:
விடுதலை சிறுத்தைகள் கட்சி தலைவர் தொல்.திருமாவளவனின் 60-வது மணிவிழாவை முன்னிட்டு, களக்காடு அருகே உள்ள திருக்குறுங்குடி புதுத்தெருவில் நெல்லை தெற்கு மாவட்ட விடுதலை சிறுத்தைகள் கட்சியின் சார்பில் மாவட்ட அளவிலான ஆண்கள் மற்றும் பெண்களுக்கான கபடி போட்டி நடந்தது. மாவட்ட செயலாளர் சுந்தர் தலைமை தாங்கினார். நாங்குநேரி சட்டமன்ற தொகுதி செயலாளர் ஈழவளவன் முன்னிலை வகித்தார். செய்யூர் சட்டமன்ற உறுப்பினர் பனையூர் பாபு போட்டியை தொடங்கி வைத்தார். நிகழ்ச்சியில் திருக்குறுங்குடி பேரூராட்சி தலைவர் இசக்கி தாய், துணைத்தலைவர் மோளி உள்பட பலர் கலந்து கொண்டனர்.
கபடி போட்டியில் பல்வேறு அணிகள் பங்கேற்றன. இதில் ஆண்கள் பிரிவில் செண்பகலிங்கபுரம் அணி முதல் இடத்தையும், இரண்டாவது மற்றும் மூன்றாவது இடங்களை புதுத்தெரு அணியும், நான்காவது இடத்தை தோப்பூர் அணியும் பெற்றன.
இதேபோல் பெண்கள் பிரிவில் எஸ்.ஏ.வி. அணி முதலிடத்தையும், பாரதி ஸ்போர்ட்ஸ் கிளப் இரண்டாவது இடத்தையும், ஸ்டென்மெட்ரிக் பள்ளி அணி மூன்றாவது இடத்தையும், வண்ணார்குளம் அணி நான்காவது இடத்தையும் பெற்றன. வெற்றி பெற்ற அணிகளுக்கு சுழற்கோப்பையும், ரொக்க பரிசும் வழங்கப்பட்டது.