பஸ்-கார் மோதல்; முதியவர் சாவு

மத்திகிரி

ஓசூர் அருகே தனியார் பஸ்-கார் மோதிய விபத்தில் முதியவர் பரிதாபமாக இறந்தார். மனைவி, மகள் படுகாயம் அடைந்தனர்.

பஸ்-கார் மோதல்

தேன்கனிக்கோட்டை அருகே உள்ள தலசூரை சேர்ந்தவர் வெங்கடேஷ் ஆச்சாரி (வயது69). இவர் தனது குடும்பத்தினருடன் காரில் கிருஷ்ணகிரியில் நடந்த ஒரு நிகழ்ச்சிக்கு நேற்று சென்றார். பின்னர் அவர்கள் மாலை மீண்டும் ஊருக்கு திரும்பி கொண்டு இருந்தனர். மத்திகிரி அருகே நாகொண்டப்பள்ளி பக்கமாக சென்ற போது எதிரே வந்த தனியார் பஸ்சும், காரும் நேருக்கு நேர் மோதி கொண்டன.

இந்த விபத்தில் வெங்கடேஷ் ஆச்சாரி இடிபாடுகளில் சிக்கி சம்பவ இடத்திலேயே பரிதாபமாக இறந்தார். அவரது மனைவி சின்ன பிட்டம்மா, மகள் ஆர்த்தி (28) ஆகிய 2 பேர் படுகாயம் அடைந்தனர். காரை ஓட்டி வந்த மருமகன் ரவிக்குமார், 6 வயது பெண் குழந்தை ஆகிய 2 பேரும் காயமின்றி உயிர் தப்பினர்.

தீவிர சிகிச்சை

இதையடுத்து அக்கம் பக்கத்தினர் படுகாயம் அடைந்த 2 பேரையும் மீட்டு ஆம்புலன்சு மூலம் ஓசூர் அரசு ஆஸ்பத்திரிக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இந்த விபத்து குறித்து தகவல் அறிந்ததும் மத்திகிரி போலீசார் விரைந்து சென்று இறந்த முதியவரின் உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகிறார்கள். விபத்து காரணமாக அந்த பகுதியில் போக்குவரத்து பாதிக்கப்பட்டது.