ஆடு மேய்க்க சென்றபோது யானை தாக்கி தொழிலாளி பலி

தேன்கனிக்கோட்டை :

தளி அருகே ஆடு மேய்க்க சென்றபோது யானை தாக்கி தொழிலாளி பலியானார்.

தொழிலாளி

கிருஷ்ணகிரி மாவட்டம் தளி அருகே ஜவளகிரி அடுத்த மிலிதிக்கி கிராமத்தை சேர்ந்தவர் தங்கவேல் (வயது 51). கூலித்தொழிலாளி. மேலும் இவர் ஆடுகளையும் வளர்த்து வந்தார். இந்த நிலையில் நேற்று தங்கவேல் ஆடுகளை மேய்க்க ஜவளகிரி வனச்சரகம் உளிபண்டா வனப்பகுதிக்கு சென்றார். பின்னர் மாலையில் வனப்பகுதியில் இருந்து ஆடுகளை கிராமத்துக்கு ஓட்டி சென்று கொண்டிருந்தார். அப்போது அந்த வழியாக காட்டு யானை ஒன்று வந்தது. இதனை கண்ட தங்கவேல் அங்கிருந்து ஓட்டம் பிடித்தார். ஆனால் யானை விடாமல் அவரை துரத்தி சென்றது. சிறிது தூரத்தில் யானை தனது துதிக்கையால் தங்கவேலை தூக்கி வீசியது. பின்னர் காலால் மிதித்து தாக்கியதில் அவர் சம்பவ இடத்திலேயே உடல் நசுங்கி பரிதாபமாக இறந்தார். இதையடுத்து யானை அங்கிருந்து சென்று விட்டது.

பொதுமக்கள் அச்சம்

வனப்பகுதிக்கு ஆடு மேய்க்க சென்றவர் வீடு திரும்பாததால் அதிர்ச்சி அடைந்த உறவினர்கள் ஜவளகிரி வனத்துறையினர் மற்றும் அஞ்செட்டி போலீசாருக்கு தகவல் தெரிவித்தனர். அதன்பேரில் வனப்பகுதிக்கு சென்ற வனத்துறையினர் மற்றும் போலீசார் இறந்து கிடந்த தங்கவேல் உடலை கைப்பற்றி பிரேத பரிசோதனைக்காக தேன்கனிக்கோட்டை அரசு மருத்துவமனைக்கு அனுப்பி வைத்தனர். இந்த சம்பவம் தொடர்பாக அஞ்செட்டி போலீசார் வழக்குப்பதிவு செய்து விசாரணை நடத்தி வருகின்றனர். யானை தாக்கி தொழிலாளி பலியான சம்பவம் அப்பகுதி பொதுமக்கள் இடையே சோகத்தையும், அச்சத்தையும் ஏற்படுத்தி உள்ளது.