சிதம்பரம் அண்ணாமலை பல்கலைக்கழகத்தில் கல்லூரி மாணவர்களுக்கான 'மாபெரும் தமிழ்க்கனவு' பிரசார நிகழ்ச்சி

தமிழ் இணைய கல்விக் கழகம் சார்பில் கல்லூரி மாணவ- மாணவிகளுக்கான "மாபெரும் தமிழ்க்கனவு" பிரசார நிகழ்ச்சி சிதம்பரம் அண்ணாமலை பல்கலைக்கழகத்தில் நாளை மறுநாள் (வெள்ளிக்கிழமை) காலை 9 மணி முதல் பிற்பகல் 1 மணி வரை நடத்தப்பட உள்ளது. தமிழ் மரபின் வளமையையும், பண்பாட்டின் செழுமையையும், சமூக சமத்துவத்தையும், பொருளாதார மேம்பாட்டுக்கான வாய்ப்புகளையும், இளம் தலைமுறையினருக்கு கொண்டும் செல்லும் ஒரு முயற்சியாக இந்த நிகழ்ச்சி நடத்தப்பட இருக்கிறது.

மாவட்டத்தில் கல்லூரி மாணவ-மாணவிகள் சுமார் 700 பேர் கலந்து கொள்ள இருக்கின்றனர். இந்த பிரசார நிகழ்ச்சியில் "கல்வி என்றொரு பேராற்றல்" என்ற தலைப்பின் கீழ், சொற்பொழிவு நடக்கிறது. மேலும், சொற்பொழிவுகளில் பங்கேற்கும் மாணவ- மாணவிகளுக்கு உயர்கல்வி மற்றும் வேலைவாய்ப்பு வழிகாட்டி, தமிழர் பெருமிதம் குறித்த குறிப்பேடுகள் வழங்க ஏற்பாடு செய்யப்பட்டுள்ளது.

இந்நிகழ்ச்சியில் வேலைவாய்ப்பு மற்றும் பயிற்சி துறை, முன்னோடி வங்கி, தாட்கோ, நூலக துறை, மகளிர் திட்டம், மாவட்ட தொழில் மையம் மற்றும் மாவட்ட திறன் பயிற்சி ஆகிய துறைகள் சார்பாக அரசின் நலத்திட்ட உதவிகள் குறித்து மாணவர்களுக்கிடையே விழிப்புணர்வு ஏற்படுத்தும் வகையில் அரங்கம் அமைக்கப்பட்டுள்ளது.

மேற்கண்ட தகவல் கடலூர் மாவட்ட கலெக்டர் அருண்தம்புராஜ் வெளியிட்டுள்ள செய்திக்குறிப்பில் கூறப்பட்டுள்ளது.