குளத்துக்குள் கார் பாய்ந்து விபத்து

நெல்லை உடையார்பட்டி குளத்துக்குள் நேற்று இரவு கார் பாய்ந்தது. இதில் 2 பேர் அதிர்ஷ்டவசமாக உயிர் தப்பினர்.

கார் பாய்ந்தது

நெல்லை அருகே உள்ள மேல தாழையூத்து வடக்கு பள்ளிவாசல் தெருவை சேர்ந்தவர்கள் அசன் (வயது 29) மற்றும் ஜியா (31). இவர்கள் 2 பேரும் நேற்று இரவு ஒரு காரில் நெல்லை சந்திப்பு நோக்கி வந்து கொண்டிருந்தனர். காரை அசன் ஓட்டினார்.

உடையார்பட்டி குளம் அருகே மதுரை ரோட்டில் வந்த போது கார் திடீரென்று கட்டுப்பாட்டை இழந்தது. இதனால் வேகமாக உடையார்பட்டி குளத்துக்குள் பாய்ந்து விழுந்தது. குளத்தில் தண்ணீர் சிறிதளவு மட்டுமே கிடப்பதால் காரில் இருந்த 2 பேரும் அதிர்ஷ்டவசமாக உயிர் தப்பினார்கள். அவர்கள் கார் கண்ணாடியை உடைத்துக்கொண்டு பத்திரமாக வெளியே வந்தனர்.

பரபரப்பு

இதுபற்றி தகவல் அறிந்ததும் நெல்லை சந்திப்பு போலீசார் விரைந்து வந்து 2 பேரிடமும் விசாரணை நடத்தினார்கள். மேலும் இது தொடர்பாக நெல்லை மாநகர போக்குவரத்து புலனாய்வு பிரிவு போலீசார் விசாரணை நடத்தி வருகின்றனர். இந்த சம்பவம் அந்த பகுதியில் சிறிது நேரம் பரபரப்பை ஏற்படுத்தியது.