பெண்ணிடம் 5 பவுன் நகை பறித்தவர் கைது

ஓசூர்:

பழனியை சேர்ந்தவர் சுமதி (வயது 52). இவர் ஓசூர் அருகே சித்தனப்பள்ளியில் உள்ள தனது மகள் வீட்டுக்கு வந்தார். இந்த நிலையில் நேற்று முன்தினம் மாலை அவர் தனது பேரனை அழைத்து கொண்டு அந்த வழியாக சென்றார். அப்போது சித்தனப்பள்ளி பஸ் நிறுத்தம் அருகே சென்றபோது, அந்த வழியாக ஸ்கூட்டரில் வந்த நபர் கண்ணிமைக்கும் நேரத்தில் சுமதி கழுத்தில் கிடந்த 5 பவுன் தங்க நகையை பறித்துக்கொண்டு தப்பியோடி விட்டார். இதனால் அதிர்ச்சியடைந்த சுமதி இதுகுறித்து ஓசூர் அட்கோ போலீசில் புகார் செய்தார். அதன்பேரில் போலீசார் விசாரணை நடத்தினர். அந்த பகுதியில் இருந்த கண்காணிப்பு கேமரா பதிவுகளை கைப்பற்றி ஆய்வு செய்தனர். அதில் ஓசூர் அலசநத்தம் பகுதியை சேர்ந்த கோபால் ரெட்டி மகன் சிவா ரெட்டி (38) என்பவரை கைது செய்து நகையை பறிமுதல் செய்தனர். இதன் மதிப்பு ரூ.2 லட்சம் என்று கூறப்படுகிறது.