ஓடும் பஸ்சில் பெண்ணிடம் மணிபர்சை திருட முயற்சி; மூதாட்டி கைது

புளியங்குடி:

தென்காசி மாவட்டம் புளியங்குடியை சேர்ந்த கணேசன் மனைவி சுதா. இவர் நேற்று புளியங்குடியில் இருந்து சேர்ந்தமரம் சென்ற அரசு பஸ்சில் பயணம் செய்தார். அப்போது பஸ்சில் இருந்த மூதாட்டி ஒருவர், சுதா வைத்திருந்த கைப்பையில் உள்ள மணிபர்சை திருட முயன்றார். இதை பயணி ஒருவர் பார்த்து கூச்சலிட்டார். உடனே சுதா மற்றும் சக பயணிகள் அந்த மூதாட்டியை பிடித்து புளியங்குடி போலீசில் ஒப்படைத்தனர்.

போலீசார் விசாரணையில், அவர் தூத்துக்குடி மாவட்டம் கழுகுமலையை சேர்ந்த காஜா மைதீன் என்பவரது மனைவி பாத்திமுத்து (70) என்பதும், அவர் பல்வேறு இடங்களில் அரசு பஸ்சில் பெண்களிடம் ஜேப்படி செய்ததும் தெரியவந்தது. இதையடுத்து போலீசார் வழக்குப்பதிவு செய்து பாத்திமுத்துவை கைது செய்து நெல்லை கொக்கிரகுளம் பெண்கள் சிறையில் அடைத்தனர்.