காட்பாடி ரெயில் நிலையத்தில் மோட்டார் சைக்கிள் திருடிச்சென்ற வாலிபர்

காட்பாடி

காட்பாடி ரெயில் நிலைய வளாகத்தில் மோட்டார் சைக்கிளை மர்ம நபர் ஒருவர் திருடி செல்லும் கண்காணிப்பு கேமரா காட்சி வெளியானதால் பரபரப்பு ஏற்பட்டுள்ளது.

மோட்டார் சைக்கிள் திருட்டு

பொன்னை அடுத்த தெங்கால் அவரக்கரை பகுதியைச் சேர்ந்தவர பிரசாந்த், கிரேன் ஆப்ரேட்டராக பணிபுரிந்து வருகிறார். இன்று அதிகாலை 12.30 மணிக்கு தனது நண்பரை ராணிப்பேட்டையில் இருந்து அழைத்து கொண்டு காட்பாடி ரெயில் நிலையத்தில் வழி அனுப்ப வந்தார்.

அப்போது ரெயில் நிலையம் எதிரில் தனது மோட்டார் சைக்கிளை விட்டு உள்ளே சென்றார். நண்பரை வழி அனுப்பி விட்டு திரும்பி வந்து பார்த்த போது மோட்டார் சைக்கிள் காணாமல் போய் இருப்பதைக் கண்டு அதிர்ச்சி அடைந்தார்.

ரெயில் நிலையத்தின் பல்வேறு பகுதிகளில் தனது இருசக்கர வாகனத்தை தேடி பார்த்தும் கிடைக்கவில்லை.

இதுகுறித்து பிரசாந்த் காட்பாடி போலீஸ் நிலையத்தில் புகார் அளித்தார். அதன்பேரில் போலீசார் வழக்குப்பதிவு செய்து விசாரணை நடத்தினர். மேலும் காட்பாடி ரெயில் நிலையத்தில் உள்ள கண்காணிப்பு கேமரா காட்சிகளை ஆய்வு செய்தனர்.

மர்ம நபர்

அப்போது மர்மநபர் ஒருவர் மோட்டார் சைக்கிளை திருடிச்செல்வது தெரியவந்தது. இந்த கண்காணிப்பு கேமரா காட்சிகள் தற்போது சமூக வலைத்தளத்தில் வெளியாகி பெரும் பரபரப்பை ஏற்படுத்தியுள்ளது.

சில தினங்களுக்கு முன்பு காட்பாடியில் வீட்டின் வெளியே நிறுத்தி வைத்திருந்த விலை உயர்ந்த மோட்டார் சைக்கிளை 3 வாலிபர்கள் திருடி சென்றனர்.

இரவு நேரங்களில் போலீசார் ரோந்து பணியை தீவிர படுத்த வேண்டும். மோட்டார் சைக்கிளை திருடும் கும்பலை விரைந்து பிடிக்க வேண்டும் என பொதுமக்கள் கோரிக்கை விடுத்துள்ளனர்.