சேதுபாவாசத்திரம் அருகே உள்ள அண்ணாநகர் புதுதெருவை சேர்ந்த சின்னபிள்ளையின் மகன் ராஜா. மீனவரான இவர் புதுதெரு கடல் பகுதியில் மீன்பிடிக்க சென்று விட்டு கரை திரும்பி உள்ளார். அப்போது தனது வலையில் ஆமை ஒன்று சிக்கியதை பார்த்துள்ளார். உடனடியாக அருகில் இருந்த மீனவர்களுடன் ஆமை உயிருடன் இருக்கிறதா? என ராஜா பார்த்தபோது, அது அரிய வகை கடல் ஆமை என்பது தெரியவந்தது.
இதையடுத்து அந்த ஆமையை ராஜா, சக மீனவர்களுடன் மீண்டும் கடலுக்குள் விட்டார். இதுகுறித்து தகவல் அறிந்த பட்டுக்கோட்டை வனச்சரக அலுவலர் சந்திரசேகரன், தஞ்சை மாவட்ட வன அலுவலர் அகில்தம்பி ஆகியோர் மீனவர் ராஜாவை பாராட்டியதோடு, வலையில் சிக்கிய அரியவகை கடல் ஆமையை மீண்டும் பத்திரமாக கடலில் விட்டதற்காக மீனவருக்கு ரொக்கம் பரிசாக வழங்கப்படும் என தெரிவித்தனர்.