வைக்கோல் படப்பில் தீ

கடையநல்லூர்:

கடையநல்லூர் கிருஷ்ணாபுரம் பகுதியில் வயல்வெளியை ஒட்டியபடி அப்பகுதியைச் சேர்ந்த விவசாயிகள் வேலுச்சாமி, நடராஜன், மாரியப்பன், வெள்ளத்துரை, அர்ஜூனன் ஆகியோருக்கு சொந்தமான 5 வைக்கோல் படப்புகள் தொடர்ச்சியாக தனித்தனியாக உள்ளன. நேற்று பகல் 1 மணி அளவில் வைக்கோல் படப்பை சுற்றியுள்ள காய்ந்த புற்களில் தீப்பிடித்து எரிந்தது. அந்த தீ வைக்கோல் படப்புகளுக்கும் பரவியது.

தகவல் அறிந்த தீயணைப்பு நிலைய அலுவலர் ஷேக் அப்துல்லா தலைமையிலான வீரர்கள் சம்பவ இடத்துக்கு விரைந்து சென்று தண்ணீரை பீய்ச்சியடித்து தீயை அணைத்தனர். இருப்பினும் 5 படைப்புகளும் முழுமையாக தீயில் எரிந்து நாசமானது. அவற்றின் மதிப்பு ரூ.3 லட்சம் இருக்கும் என்று விவசாயிகள் தெரிவித்தனர். காய்ந்த புற்களில் யாராவது பீடி குடித்து விட்டு அணைக்காமல் வீசியதால் இந்த தீ விபத்து ஏற்பட்டு இருக்கலாம் என்று கூறப்படுகிறது.