ஆடு திருடிய 3 வாலிபர்கள் கைது

பாளையங்கோட்டை திம்மராஜபுரம் பசும்பொன் நகரை சேர்ந்தவர் கிருஷ்ணன். இவரது மனைவி ராஜம்மாள். இவர் வீட்டில் வளர்த்து வந்த ஆட்டை மர்மநபர்கள் திருடி சென்று விட்டதாக கடந்த 2 நாட்களுக்கு முன்பு பாளையங்கோட்டை போலீஸ் நிலையத்தில் புகார் செய்தார். இதனையடுத்து போலீசார் வழக்குப்பதிவு செய்து விசாரணை நடத்தினர்.

விசாரணையில் பாளையங்கோட்டை கோட்டூர் பகுதியை சேர்ந்த அருண் (வயது 22), கோட்டூர் அழகுநாச்சியம்மன் கோவில் தெருவை சேர்ந்த தங்கசாமி (26), பசும்பொன் நகரை சேர்ந்த ஆறுமுககனி (25) ஆகியோர் ஆட்டை திருடி சென்றது தெரியவந்தது. இதனையடுத்து போலீசார் அவர்கள் மீது வழக்குப்பதிவு செய்து 3 பேரையும் கைது செய்தனர்.