3 வாலிபர்கள் கைது

குற்றாலம் அருகே உள்ள வாஞ்சி நகர் பகுதியைச் சேர்ந்தவர் சார்லி அமல் சிங் (வயது 35). இவர் மதுரையில் ஒரு கிறிஸ்தவ திருச்சபையில் பாதிரியாராக இருந்து வருகிறார். கடந்த 16-ந் தேதி இவர் காரில் வந்த போது குற்றாலத்தில் இருந்து செங்கோட்டை செல்லும் சாலையில் 4 பேர் வழிமறித்து லிப்ட் கேட்டு கடத்திச் சென்றனர். பின்னர் அவரிடம் இருந்த 68 கிராம் தங்க நகைகள், ரூ.39 ஆயிரம் உள்ளிட்டவைகளை பறித்துச் சென்றனர்.

இதுகுறித்து சார்லி அமல் சிங் குற்றாலம் போலீசில் புகார் செய்தார். போலீசார் வழக்குப்பதிவு செய்து இதுதொடர்பாக குற்றாலம் அருகே உள்ள காசிமேஜர்புரத்தைச் சேர்ந்த பொதிகாசலம் மகன் கணேசன் (23), மதுரை டி.பி.கே.ரோடு பகுதியைச் சேர்ந்த சதீஷ்குமார் மகன் வைரமுத்து (20), தூத்துக்குடியை சேர்ந்த சுப்பிரமணியன் மகன் மகேஷ் சண்முகம் (31) ஆகிய 3 பேரை நேற்று கைது செய்தனர். அவர்களிடமிருந்து 1 பவுன் தங்கச் சங்கிலி, ரூ.39 ஆயிரம் ரொக்கம் ஆகியவற்றை போலீசார் கைப்பற்றினர். இந்த வழக்கு தொடர்பாக மேலும் ஒருவரை போலீசார் தேடி வருகிறார்கள்.