57-வது நாள் ஸ்டெர்லைட் போராட்டம்; திருச்செந்தூர் தனியார் கல்லூரி மாணவர்கள் வகுப்புகளை புறக்கணித்து போராட்டம்

தூத்துக்குடி, 

தூத்துக்குடி ஸ்டெர்லைட் ஆலையை மூட வலியுறுத்தி அ.குமரெட்டியாபுரம் கிராமமக்கள் தங்களது  கிராமத்தில் உள்ள ஒரு மரத்தின் அடியில் அமர்ந்து கடந்த பிப்ரவரி மாதம் முதல் தொடர் போராட்டத்தில் ஈடுபட்டுள்ளார்கள். 

அவர்களது போராட்டத் திற்கு தினமும் பல்வேறு கட்சியினர் மற்றும் அமைப்பினர் ஆதரவு தெரிவித்து வருவதால் தூத்துக்குடியில் ஸ்டெர்லைட் ஆலைக்கு எதிரான போராட்டம் தீவிர மடைந்தது.   

அ.குமரெட்டியாபுரம் கிராமமக்களின் தொடர் போராட்டத்தையடுத்து, ஸ்டெர்லைட் ஆலை அருகே உள்ள மற்ற கிராமங்களான பண்டாரம்பட்டி, சில்வர்புரம், சங்கராப்பேரி, மடத்தூர், மீளவிட்டான், தெற்கு வீரபாண்டியபுரம் ஆகிய கிராமங்களிலும் மக்கள் போராட்டத்தை தொடங்கினர். 

மேலும் தூத்துக்குடி தபால் தந்தி காலனி மக்களும் நேற்று முன்தினம் முதல் போராட்டத்தில் ஈடுபட்டுள்ளார்கள். தூத்துக்குடியில் தற்போது ஸ்டெர்லைட் ஆலைக்கு எதிராக மொத்தம் 8 இடங்களில் தொடர் போராட்டத்தில் மக்கள் ஈடுபட்டு வருகின்றனர். 

அ.குமரெட்டியாபுரத்தில் பொதுமக்களின் போராட்டத்தில் தினமும் வெவ்வேறு அரசியல் கட்சி தலைவர்கள் பங்கேற்று வருகிறார்கள். நேற்று 56-வது நாளாக நடந்த போராட்டத்தில் தே.மு.தி.க. தலைவர் விஜயகாந்தின் மனைவியும், தே.மு.தி.க. மகளிர் அணி மாநில தலைவியுமான பிரேமலதா பங்கேற்றார்.  

பின்பு அவர் கட்சியினருடன் சென்று ஸ்டெர்லைட் ஆலை முன்பு முற்றுகை போராட்டத்தில் ஈடுபட்டார். போராட்டத் தில் ஈடுபட்ட பிரேமலதா, தே.மு.தி.க. மாநில துணை பொதுச்செயலாளர் சுதீஷ் உள்ளிட் டோரை போலீசார் கைது செய்தனர். பிரேமலதா, சுதீஷ் உள்பட 293 பேர் மீது வழக்கு பதிவு செய்யப்பட்டு உள்ளது.

இன்று 57 வது நாளாக போராட்டம்  தொடருகிறது

ஸ்டெர்லைட் ஆலையை மூடக்கோரி பொதுமக்கள் மட்டுமின்றி பல்வேறு கல்லூரிகளின் மாணவர்கள் போராட்டத்தில் ஈடுபட்டனர். கடந்த வாரம் தூத்துக்குடியில் உள்ள 2 தனியார் மகளிர் கல்லூரிகளின், மாணவிகள் வகுப்புகளை புறக்கணித்து கல்லூரி முன்பு அமர்ந்து தர்ணாவில் ஈடுபட்டார்கள்.

ஸ்டெர்லைட் ஆலையை மூடக்கோரி தூத்துக்குடி கோர்ட்டு வக்கீல்கள் கடந்த வாரம் தொடர்ந்து 3 நாட்கள் கோர்ட்டு புறக்கணிப்பு போராட்டத்தில் ஈடுபட்டனர். அவர்கள் இன்று மோட்டார் சைக்கிள் பேரணி நடத்தினர். இதில் 50-க்கும் மேற்பட்ட வக்கீல்கள் கலந்து கொண்டனர். 

அவர்கள் தூத்துக்குடி கோர்ட்டில் இருந்து மோட்டார் சைக்கிளில் அ.குமரெட்டியாபுரம் கிராமத்திற்கு பேரணியாக சென்று, அங்கு இன்று 57-வது நாளாக நடந்த  போராட்டத்தில் பங்கேற்றனர்.

ஸ்டெர்லைட் ஆலையை மூடக்கோரி திருச்செந்தூர் தனியார் கல்லூரி மாணவர்கள் வகுப்புகளை புறக்கணித்து போராட்டம் நடைபெற்றது.