ஓட்டல் உரிமையாளரின் வீட்டில்½ கிலோ தங்கம், ரூ.9 லட்சம் கொள்ளை

பரமத்திவேலூர்

ஓட்டல் உரிமையாளர்

நாமக்கல் மாவட்டம் பரமத்திவேலூர் அருகே உள்ள குப்புச்சிபாளையம், குச்சிக்காடு பகுதியை சேர்ந்தவர் கந்தசாமி (வயது 54). இவர் பரமத்திவேலூர் பழைய பைபாஸ் சாலையில் தாபா ஓட்டல் நடத்தி வருகிறார். இவரது மனைவி கலைச்செல்வி (45). இவர்களது மகள் நிஷாந்தி (23). இவருக்கு கடந்த வாரம் நிச்சயம் செய்யப்பட்டு அடுத்த மாதம் (அக்டோபர்) திருமணம் நடக்க இருந்தது.

நேற்று காலை கந்தசாமி தனது குடும்பத்தினருடன் திருமணத்திற்கு துணிமணிகள் எடுக்க ஈரோட்டுக்கு காரில் புறப்பட்டு சென்றனர். கந்தசாமியின் தாயார் அருக்காணி (80) மட்டும் வீட்டில் இருந்தார். அப்போது தெரு முனையில் காரை நிறுத்திய 2 மர்மநபர்கள் கந்தசாமி வீட்டுக்கு வந்தனர்.

தங்கம், பணம் கொள்ளை

வீட்டில் தனியாக இருந்த மூதாட்டி அருக்காணியிடம், ஒருவர் பேச்சு கொடுத்தார். அப்போது மர்மநபர், வீட்டு வேலைக்காக அண்ணன் வரச் சொன்னார் என தெரிவித்தார். வீட்டில் யாரும் இல்லை. அனைவரும் துணி எடுக்க சென்றுவிட்டனர். நாளைக்கு வாருங்கள் என மூதாட்டி கூறினார்.

இந்தநிலையில் வீட்டிற்குள் புகுந்த மற்றொரு மர்மநபர் வீட்டின் முன்புற கதவை உடைத்து உள்ளே சென்று பீரோ சாவியை எடுத்து லாக்கரில் திருமணத்திற்கு சீர்வரிசை கொடுப்பதற்காக வைத்திருந்த 60 பவுன் நகை மற்றும் ரூ.9 லட்சம் பணம் ஆகியவற்றை மர்மநபர்கள் திருடி சென்று விட்டனர்.

மர்மநபர்களுக்கு வலைவீச்சு

தோட்டத்திற்கு சென்றுவிட்டு வீட்டிற்கு வந்த மூதாட்டி, வீட்டின் பூட்டு உடைக்கப்பட்டு இருந்ததை கண்டு அதிர்ச்சி அடைந்தார். இதுகுறித்து மூதாட்டி அக்கம்பக்கத்தினரிடமும், கந்தசாமிக்கும் தகவல் தெரிவித்தார். வீட்டிற்கு வந்த கந்தசாமி பீரோவை திறந்து பார்த்தார். அப்போது பீரோவில் இருந்த 60 பவுன் தங்க நகை, ரூ.9 லட்சம் பணம் திருடி சென்று இருப்பது தெரியவந்தது.

இந்த சம்பவம் குறித்து கந்தசாமி வேலூர் போலீசாருக்கு தகவல் தெரிவித்தார். அங்கு விரைந்து வந்த பரமத்திவேலூர் துணை போலீஸ் சூப்பிரண்டு ராஜமுரளி, நாமக்கல் கூடுதல் போலீஸ் சூப்பிரண்டு ராஜு, இன்ஸ்பெக்டர் இந்திராணி மற்றும் போலீசார் வழக்குப்பதிவு செய்து தங்க நகை மற்றும் பணத்தை திருடி சென்ற மர்மநபர்களை வலைவீசி தேடி வருகின்றனர். மேலும் கைரேகை நிபுணர்களும் வந்து சோதனை மேற்கொண்டு வருகின்றனர்.

மகள் திருமணத்திற்கு வாங்கி வைத்த நகைகள், பணத்தை மர்மநபர்கள் திருடி சென்ற சம்பவம் பரமத்திவேலூர் பகுதியில் பரபரப்பை ஏற்படுத்தி உள்ளது.