மராட்டிய மாநிலம்: பாதுகாப்பு படையினர் நடத்திய தாக்குதலில் 12 மாவோயிஸ்டுகள் சுட்டுக்கொலை

மும்பை,

மராட்டிய மாநிலம் கட்சிரோலி மாவட்டத்தில் உள்ள வண்டோலி என்ற கிராமத்தில் இன்று பாதுகாப்பு படையினர் மற்றும் மாவோயிஸ்டுகள் இடையே துப்பாக்கி சண்டை வெடித்தது. சுமார் 6 மணி நேரம் நீடித்த இந்த மோதலில் 5 பெண்கள், 7 ஆண்கள் என மொத்தம் 12 மாவோயிஸ்டுகள் சுட்டுக்கொல்லப்பட்டனர்.

மேலும் இந்த சம்பவத்தில் ஒரு காவல்துறை சப்-இன்ஸ்பெக்டர் மற்றும் ஒரு பாதுகாப்பு படை வீரர் ஆகியோர் காயமடைந்தனர். அவர்கள் நாக்பூரில் உள்ள மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.

இது குறித்து மாவட்ட காவல் கண்காணிப்பாளர் நீலோத்பல் கூறுகையில், கட்சிரோலி மாவட்டத்தின் வடக்கு பகுதியில் இயங்கி வந்த அனைத்து ஆயுத குழுக்களும் அழிக்கப்பட்டு விட்டதாகவும், அங்கு தற்போது நக்சல்கள் யாரும் இல்லை என்றும் தெரிவித்தார்.