செம்மொழிகள் மேம்பாட்டில் தமிழ் மொழிக்கு அதிக நிதி ஒதுக்கீடு - மத்திய அரசு தகவல்

புதுடெல்லி,

தொன்மை மொழிகளின் ஊக்குவிப்பு பற்றி மக்களவையில் உறுப்பினர் ஒருவர் கேட்ட கேள்விக்கு மத்திய கலாசாரம் மற்றும் சுற்றுலாத்துறை மந்திரி கஜேந்திர சிங் ஷெகாவத் நேற்று எழுத்துப்பூர்வமாக பதில் அளித்து இருந்தார்.

அந்த பதிலில் கூறப்பட்டு இருந்ததாவது:-

தமிழ், சமஸ்கிருதம், கன்னடம், தெலுங்கு, மலையாளம் மற்றும் ஒடியா ஆகிய 6 இந்திய மொழிகளுக்கு செம்மொழி அந்தஸ்து வழங்கப்பட்டுள்ளது. இதில் முதன்முதலாக 12-10-2004 அன்று தமிழ் மொழிக்கும், 25-11-2005 அன்று சமஸ்கிருதத்துக்கும், 31-10-2008 அன்று கன்னடம் மற்றும் தெலுங்குக்கும், 8-8-2013 அன்று மலையாளத்துக்கும், 11-3-2014 அன்று ஒடியா மொழிக்கும் செம்மொழி அந்தஸ்து வழங்கப்பட்டது.

செம்மொழிகள் உள்பட அனைத்து இந்திய மொழிகளையும் மேம்படுத்துவதே அரசின் கொள்கை. தேசிய கல்விக்கொள்கை-2020 அனைத்து இந்திய மொழிகளையும் மேம்படுத்துவதில் கவனம் செலுத்துகிறது. இந்திய மொழிகளின் மத்திய நிறுவனம் கன்னடம், தெலுங்கு, மலையாளம் மற்றும் ஒடியா ஆகிய 4 செம்மொழிகள் உள்பட அனைத்து இந்திய மொழிகளின் மேம்பாட்டுக்காக செயல்படுகிறது. தமிழ் மொழியின் மேம்பாடு செம்மொழித் தமிழின் மத்திய நிறுவனத்தால் செய்யப்படுகிறது.

சமஸ்கிருத மொழி, 3 மத்திய பல்கலைக்கழகங்கள் மூலம் மேம்படுத்தப்படுகிறது. இந்த பல்கலைக்கழகங்களுக்கு சமஸ்கிருத மொழியில் கற்பித்தல் மற்றும் ஆராய்ச்சிக்காக நிதி வழங்கப்படுகிறது. சமஸ்கிருதத்தின் தொன்மை அம்சம் தொடர்பான எந்த பணியையும் மேற்கொள்வதற்கு தனி நிதி வழங்கப்படவில்லை.

கடந்த 10 ஆண்டுகளில் செம்மொழி தமிழின் மேம்பாட்டுக்கு ரூ.51½ கோடியும், தெலுங்கு மொழிக்கு ரூ.11.83 கோடியும், கன்னடத்துக்கு ரூ.11.46 கோடியும், ஒடியா மொழிக்கு ரூ.3.81 கோடியும், மலையாளத்துக்கு ரூ.3.71 கோடியும் ஒதுக்கப்பட்டு உள்ளது.

இவ்வாறு பதில் கூறப்பட்டு உள்ளது.