21 வது ஆண்டு கார்கில் நினைவு தினம் - ராணுவ வீரர்களுக்கு ராகுல் காந்தி மரியாதை

புதுடெல்லி,

கடந்த 1999-இல் நடைபெற்ற கார்கில் போரில் இந்தியாவின் வெற்றிக்காக உயிர்த்தியாகம் செய்த வீரர்களுக்கு மரியாதை செலுத்தும் வகையில், ஒவ்வொரு ஆண்டும் ஜூலை 26-ஆம் தேதி கார்கில் போர் வெற்றி தினம் கடைபிடிக்கப்படுகிறது.

அந்தவகையில் கார்கில் போர் வெற்றியின் 21-ஆவது ஆண்டு தினம் இன்று நாடு முழுவதும் கொண்டாடப்பட்டு வருகிறது. இதை முன்னிட்டு டெல்லியில் அமைந்துள்ள தேசிய போர் நினைவிடத்தில், பாதுகாப்புத்துறை மந்திரி ராஜ்நாத் சிங் மரியாதை செலுத்தினார். பாதுகாப்புத் துறை இணை மந்திரி ஸ்ரீபாத் நாயக் மற்றும் முப்படை தளபதிகள் மரியாதை செலுத்தினர்.

பிரதமர் மோடி இன்று அகில இந்திய வானொலியில், ‘மன் கீ பாத்’ நிகழ்ச்சியில் பேசிய போது, கார்கில் போர் மூலம் ஒட்டுமொத்த உலகமே இந்திய வீரர்களின் திறமையையும் வீரத்தையும் பார்த்தது என்று குறிப்பிட்டார்.

இந்நிலையில் கார்கில் நினைவு தினம் குறித்து தனது டுவிட்டர் பக்கத்தில் பதிவிட்டுள்ள காங்கிரஸ் கட்சியின் மூத்த தலைவர் ராகுல் காந்தி, “இந்திய ராணுவ வீரர்களில் தியாகம் போற்றப்படக்கூடியது” என்று தெரிவித்துள்ளார். எந்த சூழலிலும் நமது நாட்டைக் காக்கும் ராணுவ வீரர்களுக்கு எப்போதும் தலைவணங்குவதாக தனது பதிவில் ராகுல்காந்தி தெரிவித்துள்ளார்.