நாமக்கல் உழவர் சந்தையில் சின்ன வெங்காயம் கிலோ ரூ.18-க்கு விற்பனை விவசாயிகள் கவலை

நாமக்கல்:

நாமக்கல் உழவர் சந்தையில் சின்ன வெங்காயம் கிலோ ரூ.18-க்கு விற்பனை செய்யப்பட்டதால் விவசாயிகள் கவலை அடைந்துள்ளனர்.

நாமக்கல்- கோட்டை சாலையில் உழவர் சந்தை செயல்பட்டு வருகிறது. இங்கு சுற்றுவட்டார பகுதிகளை சேர்ந்த விவசாயிகள் தங்களது நிலங்களில் விளைந்த காய்கறி மற்றும் பழங்களை விற்பனை செய்து வருகின்றனர். வார இறுதி நாட்களில் இங்கு காய்கறி விற்பனை விறுவிறுப்பாக நடைபெறும்.

அந்த வகையில் நேற்று 19½ டன் காய்கறிகள் மற்றும் 4¾ டன் பழங்கள் என மொத்தம் சுமார் 24¼ டன் விற்பனைக்கு வந்தன. இவை ரூ.7 லட்சத்து 9 ஆயிரத்து 15-க்கு விற்பனை செய்யப்பட்டன. இவற்றை 4,380 பேர் வாங்கி சென்றனர்.

நாமக்கல் உழவர் சந்தையில் நேற்று தக்காளி கிலோ ரூ.50-க்கும், கத்தரி கிலோ ரூ.28-க்கும், வெண்டைக்காய் கிலோ ரூ.36-க்கும், புடலங்காய் கிலோ ரூ.32-க்கும், பீர்க்கன் கிலோ ரூ.56- க்கும், பீட்ரூட் கிலோ ரூ.28-க்கும், கேரட் கிலோ ரூ.48-க்கும், பீன்ஸ் கிலோ ரூ.52-க்கும், முட்டைக்கோஸ் கிலோ ரூ.16-க்கும், இஞ்சி கிலோ ரூ.45-க்கும் விற்பனை செய்யப்பட்டன. சின்ன வெங்காயம் கிலோ ரூ.18-க்கும், பெரிய வெங்காயம் கிலோ ரூ.24-க்கும் விற்பனை செய்யப்பட்டன.

காய்கறிகளின் வரத்து சற்று அதிகமாக இருந்ததால், அவற்றின் விலை குறைந்து காணப்பட்டதாக உழவர் சந்தை அதிகாரிகள் தெரிவித்தனர். சின்ன வெங்காயம் விலை தொடர்ந்து வீழ்ச்சி அடைந்த நிலையிலேயே இருப்பதால் விவசாயிகள் கவலை அடைந்துள்ளனர். எனவே அவற்றை பட்டறைகளில் சேமிக்கும் பணியில் விவசாயிகள் ஈடுபட்டு வருகின்றனர்.