அயோத்தியாப்பட்டணத்தில் ஏரியில் மூழ்கி சிறுவன் பலி

அயோத்தியாப்பட்டணம்:

அயோத்தியாப்பட்டணம் ஏரிக்காடு பகுதியில் உள்ள ஏரியில் நேற்று மாலை 4 மணி அளவில் 4 சிறுவர்கள் குளித்துக்கொண்டிருந்துள்ளனர். அப்போது திடீரென ஒரு சிறுவன் நீரில் மூழ்கி சத்தம் போட்டுள்ளார். இதையடுத்து மற்ற 3 சிறுவர்கள் தப்பி ஓடியுள்ளனர். இந்த நிலையில் சிறுவனின் அலறல் சத்தம் கேட்டு அக்கம் பக்கத்தினர் வாழப்பாடி தீயணைப்பு நிலையத்துக்கும், காரிப்பட்டி போலீசாருக்கும் தகவல் கொடுத்துள்ளனர். தகவலின் பேரில் சம்பவ இடத்திற்கு சென்ற தீயணைப்பு துறையினர் போலீசார் உதவியுடன், ஒரு மணி நேரத்திற்கு பிறகு சிறுவன் உடலை மீட்டனர். உடலை கைப்பற்றிய காரிப்பட்டி போலீசார் பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்துள்ளனர். மேலும் இதுகுறித்து போலீசார் வழக்குப்பதிவு செய்து சிறுவன் யார்? எந்த ஊரை சேர்ந்தவர்? என்பது குறித்து விசாரணை நடத்தி வருகின்றனர்.